- జాతీయ షూటింగ్‌ ఛాంపియన్‌షిప్‌
న్యూఢిల్లీ: 64వ జాతీయ ఎయిర్‌ రైఫిల్‌ షూటింగ్‌ పోటీల్లో మాజీ ప్రపంచ నంబర్‌ వన్‌ షూటర్‌ దివ్యాన్ష్‌ సింగ్‌ పన్వార్‌ స్వర్ణ పతకం కైవసం చేసుకున్నాడు. భోపాల్‌లో జరుగుతున్న ఎయిర్‌ రైఫిల్‌ షూటింగ్‌ పోటీల్లో దివ్యాన్ష్‌ 630.3 పాయింట్లతో అగ్రస్థానంలో నిలిచాడు. ఈ పోటీల్లో మొత్తం 768 షూటర్ల పాల్గొన్నారు. స్వర్ణ పతకం కైవసం చేసుకొనే క్రమంలో దివ్యాన్స్‌ 0.7పాయింట్ల వ్యత్యాసంతో అగ్రస్థానంలో నిలిచాడు. 24 షాట్స్‌ ఫైనల్‌ పోటీలో ఆఖరి రెండు షాట్స్‌లో 10.6 పాయింట్లు సాధించి బంగారు పతకాన్ని ముద్దాడాడు. క్వాలిఫికేషన్‌ రౌండ్‌లో ఆఖరి షాట్‌లో 0.2పాయింట్లు తేడాతో రుద్రాక్ష్‌ను చిత్తుచేశాడు. ఈ విభాగంలోనే హ్రిదరు హజారికాకు రజితం, సాహు తుషార్‌ మానే, పార్ధ్‌ మఖిజాకు కాంస్య పతకాలు దక్కాయి. జూనియర్స్‌ విభాగంలోనూ దివ్యాన్ష్‌ 252.2(630.3పాయింట్లు) అగ్రస్థానంలో నిలిచి ఈ విభాగంలోనూ బంగారు పతకాన్ని కైవసం చేసుకున్నాడు.