- మూడోరౌండ్‌లోకి శ్రీకాంత్‌, సింధు, లక్ష్యసేన్‌
హెల్వా(స్పెయిన్‌): బిడబ్ల్యుఎఫ్‌ ప్రపంచ ఛాంపియన్‌షిప్‌లో భారత షట్లర్ల జోరు కొనసాగుతోంది. మంగళవారం జరిగిన రెండోరౌండ్‌ పోటీలో కిదాంబి శ్రీకాంత్‌, లక్ష్యసేన్‌, పివి సింధు విజయాలను నమోదు చేసుకొని మూడోరౌండ్‌లోకి దూసుకెళ్లారు. మహిళల సింగిల్స్‌ రెండోరౌండ్‌ పోటీలో 6వ సీడ్‌ సింధు 21-7, 21-9తేడాతో మార్టీనా రెపిస్కా(స్లొవేకియా)ను చిత్తుచేసింది. ఇక పురుషుల సింగిల్స్‌లో 12వ సీడ్‌ కిదాంబి శ్రీకాంత్‌ 15-21, 21-18, 21-17తేడాతో లీ-షీ-ఫెంగ్‌(చైనా)ను చిత్తుచేయగా.. మరో పోటీలో యువ షట్లర్‌ లక్ష్యసేన్‌ 15వ సీడ్‌ కెంటా నిషీమోటోకు షాక్‌ ఇచ్చాడు. లక్ష్యసేన్‌ 22-20, 15-21, 21-18తేడాతో కెంటాపై సంచలన విజయం నమోదు చేసుకొని మూడోరౌండ్‌లోకి దూసుకెళ్లాడు. ఇక మిక్స్‌డ్‌ డబుల్స్‌లో సౌరభ్‌ శర్మ-అనుష్క పరేక్‌ జోడీ 8-21, 18-21తో 9వ సీడ్‌ అమెరికాకు చెందిన పెంగ్‌-జింగ్‌ చేతిలో పరాజయాన్ని చవిచూశారు. పురుషుల డబుల్స్‌లో 8వ సీడ్‌ చిరాగ్‌ శెట్టి-సాత్త్విక్‌ సాయిరాజ్‌ జోడీ 27-25, 21-17తేడాతో చైనీస్‌ తైపీ జోడీని ఓడించి మూడోరౌండ్‌లోకి ప్రవేశించారు.