- బీసీసీఐ సెలక్షన్‌ కమిటీ నిర్ణయం
ముంబయి : వైట్‌బాల్‌ ఫార్మాట్‌ వైస్‌ కెప్టెన్‌ కెఎల్‌ రాహుల్‌పై సీనియర్‌ సెలక్షన్‌ కమిటీ మరింత విశ్వాసం నిలిపింది. తొడ కండరం గాయంతో దక్షిణాఫ్రికాతో టెస్టు సిరీస్‌కు దూరమైన రోహిత్‌ శర్మ స్థానంలో కెఎల్‌ రాహుల్‌ను వైస్‌ కెప్టెన్‌గా ఎంపిక చేసింది. విరాట్‌ కోహ్లిని తప్పించి రోహిత్‌ వర్మకు వన్డే పగ్గాలు అప్పగించిన సెలక్షన్‌ కమిటీ.. అజింక్య రహానెపై వేటు వేసి టెస్టు జట్టు వైస్‌ కెప్టెన్సీ బాధ్యతలు సైతం రోహిత్‌కు బదలాయించిన సంగతి తెలిసిందే. ' ఆల్‌ ఇండియా సీనియర్‌ సెలక్షన్‌ కమిటీ రానున్న దక్షిణాఫ్రికాతో మూడు టెస్టుల సిరీస్‌కు కెఎల్‌ రాహుల్‌ను వైస్‌ కెప్టెన్‌గా ఎంపిక చేసింది. గాయంతో దూరమైన రోహిత్‌ శర్మ స్థానంలో కెఎల్‌ రాహుల్‌ వైస్‌ కెప్టెన్సీ బాధ్యతలు నిర్వర్తిస్తాడు' అని బీసీసీఐ కార్యదర్శి ఓ ప్రకటనలో తెలిపాడు. భారత్‌, దక్షిణాఫ్రికా తొలి టెస్టు డిసెంబర్‌ 26న సెంచూరియన్‌లో ఆరంభం కానుంది.
