- టెస్టుల్లో విరాట్‌ ర్యాంక్‌ పతనం
- ఐసీసీ టెస్ట్‌ ర్యాంకింగ్స్‌ విడుదల
దుబాయ్: అంతర్జాతీయ క్రికెట్‌ మండలి(ఐసీసీ) బుధవారం ప్రకటించిన టెస్టు బ్యాటర్స్‌ ర్యాంకింగ్స్‌లో టీమిండియా కెప్టెన్‌ విరాట్‌ కోహ్లీ(756పాయింట్లు) ఏడో ర్యాంక్‌కు పడిపోయాడు. ఈ క్రమంలో రోహిత్‌ శర్మ(5వ స్థానం) ర్యాంక్‌లో ఎలాంటి మార్పు లేదు. యాషెస్‌ రెండో టెస్టులో శతకం, అర్ధశతకం సాధించిన ఆస్ట్రేలియా మిడిలార్డర్‌ బ్యాటర్‌ మార్నస్‌ లబుషేన్‌(912పాయింట్లు) అగ్రస్థానానికి ఎగబాకాడు. ఇంగ్లండ్‌ కెప్టెన్‌ జో రూట్‌(897పాయింట్లు) ఒక స్థానం కోల్పోయి రెండో స్థానానికి పరిమితమయ్యాడు. స్టీవ్‌ స్మిత్‌, న్యూజిలాండ్‌ కెప్టెన్‌ కేన్‌ విలియమ్సన్‌ మూడు, నాలుగు స్థానాల్లో కొనసాగుతున్నారు. డేవిడ్‌ వార్నర్‌ ఆరో స్థానంలో నిలిచాడు. ఇక టెస్టు బౌలర్ల జాబితాలో ఆసీస్‌ బౌలర్‌ పాట్‌ కమిన్స్‌(904పాయింట్లు), భారత టాప్‌ స్పిన్నర్‌ రవిచంద్రన్‌ అశ్విన్‌(883పాయింట్లు) తొలి రెండు ర్యాంకుల్లో ఉన్నారు.