- ఐసీసీ బౌలింగ్‌, ఆల్‌రౌండర్‌ ర్యాంకింగ్స్‌
దుబాయ్‌ : టీమ్‌ ఇండియా ట్రంప్‌కార్డ్‌ స్పిన్నర్‌ రవిచంద్రన్‌ అశ్విన్‌ 2021 ఏడాదిని ఘనంగా ముగిస్తున్నాడు. ఈ ఏడాది ఐసీసీ ఉత్తమ టెస్టు క్రికెటర్‌ అవార్డు రేసులో నిలిచిన అశ్విన్‌.. తాజాగా ఐసీసీ ర్యాంకింగ్స్‌లో అత్యుత్తమ స్థానాలతో ఏడాదిని ముగిస్తున్నాడు. ఐసీసీ టెస్టు బౌలింగ్‌, ఆల్‌రౌండర్‌ ర్యాంకింగ్స్‌లో రవిచంద్రన్‌ అశ్విన్‌ రెండో స్థానంలో కొనసాగుతున్నాడు. మరో స్పిన్‌ ఆల్‌రౌండర్‌ రవీంద్ర జడేజా ఈ జాబితాలో మూడో స్థానం నిలుపుకున్నాడు. బ్యాటింగ్‌ ర్యాంకింగ్స్‌ జాబితాలో రోహిత్‌ శర్మ, కెప్టెన్‌ విరాట్‌ కోహ్లిలు తమ స్థానాలను నిలుపుకున్నారు. రోహిత్‌ శర్మ ఐదో స్థానంలో కొనసాగుతుండగా.. విరాట్‌ కోహ్లి ఏడో స్థానానికి పడిపోయిన సంగతి తెలిసిందే. రోహిత్‌ శర్మ 797 రేటింగ్‌ పాయింట్లతో ఉండగా, విరాట్‌ కోహ్లి 756 పాయింట్లతో కొనసాగుతున్నాడు.
బ్యాటర్ల జాబితాలో మార్నస్‌ లబుషేన్‌ (915), జో రూట్‌ (900), కేన్‌ విలియమ్సన్‌ (879), స్టీవ్‌ స్మిత్‌ (877) తొలి నాలుగు స్థానాల్లో నిలిచారు. రోహిత్‌, విరాట్‌ తోడుగా డెవిడ్‌ వార్నర్‌, కరుణరత్నె, బాబర్‌ ఆజామ్‌, ట్రావిశ్‌ హెడ్‌లు టాప్‌-10లో నిలిచారు. బౌలింగ్‌ జాబితాలో ఆసీస్‌ కెప్టెన్‌ పాట్‌ కమిన్స్‌ అగ్రస్థానంలో కొనసాగుతున్నాడు. జట్టు ర్యాంకింగ్స్‌లో భారత్‌ అగ్రస్థానంలో కొనసాగుతోంది. న్యూజిలాండ్‌, ఆస్ట్రేలియా, ఇంగ్లాండ్‌, పాకిస్థాన్‌ తర్వాతి స్థానాల్లో నిలిచాయి.
