- లక్ష్యం 388, ప్రస్తుతం 30/0
- యాషెస్‌ సిరీస్‌ నాల్గో టెస్టు
యాషెస్‌ సిరీస్‌లో కనీస పోటీ ఇవ్వని ఇంగ్లాండ్‌ ఇప్పటికే తీవ్ర విమర్శలు ఎదుర్కొంటుంది. న్యూ ఇయర్‌ టెస్టులోనూ ఇంగ్లాండ్‌ వైఫల్య గాథ షరా మామూలే అనుకున్న దశలో జానీ బెయిర్‌స్టో వీరోచిత శతకం ఇంగ్లీష్‌ శిబిరంలో కొత్త ఉత్సాహం నింపింది. చివరి రోజు కష్టసాధ్యమైన, భారీ లక్ష్యాన్ని ఛేదించేందుకు ఇంగ్లాండ్‌ ఇప్పుడు సిద్ధమవుతోంది. ఇంగ్లాండ్‌కు ఆస్ట్రేలియా 388 పరుగుల రికార్డు లక్ష్యాన్ని నిర్దేశించగా.. ఇంగ్లాండ్‌ ప్రస్తుతం 30/0తో కొనసాగుతోంది. చివరి రోజు వర్ష సూచనలు సైతం ఉండటంతో సిడ్నీ టెస్టు ఫలితం ఉత్కంఠ కనిపిస్తోంది. ఆస్ట్రేలియా విజయానికి పది వికెట్లు అవసరంగా.. ఇంగ్లాండ్‌ మరో 358 పరుగుల దూరంలో నిలిచింది. చివరి రోజు ఆసీస్‌ పది వికెట్ల ప్రదర్శన పరిపూర్ణం చేస్తుందా? ఇంగ్లాండ్‌ వీరోచిత పోరాటంతో కథను మలుపు తిప్పుతుందా? చూడాలి.
నవతెలంగాణ-సిడ్నీ
ఆస్ట్రేలియా, ఇంగ్లాండ్‌ న్యూ ఇయర్‌ టెస్టు సమరం ఆసక్తికర ముగింపుకు చేరుకుంది!. తొలి మూడు టెస్టుల్లో దారుణ పరాజయం చవిచూసిన ఇంగ్లాండ్‌ జట్టు కొత్త ఏడాదిలో సరికొత్త ఉత్సాహం చూపిస్తోంది. జానీ బెయిర్‌స్టో శతకంతో తొలి ఇన్నింగ్స్‌లో ప్రతిఘటించిన ఇంగ్లాండ్‌.. ఇప్పుడు ఏకంగా చివరి రోజు ఆస్ట్రేలియాకు సవాల్‌ విసిరే స్థాయికి చేరుకుంది. ఉస్మాన్‌ ఖవాజా మరో శతకంతో చెలరేగటంతో ఇంగ్లాండ్‌కు ఆసీస్‌ 388 పరుగుల రికార్డు లక్ష్యాన్ని నిర్దేశించింది. నాల్గో రోజు ఆట ముగిసే సమయానికి ఇంగ్లాండ్‌ రెండో ఇన్నింగ్స్‌లో 30/0తో కొనసాగుతోంది. ఓపెనర్లు జాక్‌ క్రావ్లీ (22 బ్యాటింగ్‌, 32 బంతుల్లో 3 ఫోర్లు), హసీబ్‌ హమీద్‌ (8 బ్యాటింగ్‌, 34 బంతుల్లో) అజేయంగా ఆడుతున్నారు. 11 ఓవర్లలోనే 30 పరుగులు సాధించిన ఇంగ్లాండ్‌ ఓపెనర్లు తమ లక్ష్యాన్ని పరోక్షంగా బ్యాట్‌తోనే చెప్పారు. ఆసీస్‌ పేసర్లపై ఎదురుదాడి చేసిన ఇంగ్లాండ్‌ ఓపెనర్లు పరుగుల వేటపైనే ప్రధానంగా దృష్టి సారించారు. చివరి రోజు ఆటలో ఇంగ్లాండ్‌కు మరో 358 పరుగులు అవసరం. యాషెస్‌ సిరీస్‌లో 4-0 ఆధిక్యానికి ఆతిథ్య ఆస్ట్రేలియా 10 వికెట్ల దూరంలో నిలిచింది. చివరి రోజు వర్షం సూచనల నేపథ్యంలో పూర్తి ఆట సాధ్యపడుతుందనే అంచనాలు స్వల్పంగానే ఉన్నాయి. జో రూట్‌, జానీ బెయిర్‌స్టో, జోశ్‌ బట్లర్‌ జోరుమీదున్నారు. దీంతో చివరి రోజు ఆస్ట్రేలియాకు ఝలక్‌ ఇచ్చేందుకు ఇంగ్లాండ్‌ సిద్ధమవుతోంది.
నాల్గో రోజు ఆటలో అంతకముందు ఉస్మాన్‌ ఖవాజ (101 నాటౌట్‌, 138 బంతుల్లో 10 ఫోర్లు, 2 సిక్స్‌లు) మేనియా కొనసాగింది. తొలి ఇన్నింగ్స్‌లో శతకబాదిన ఉస్మాన్‌ ఖవాజ.. యాషెస్‌ టెస్టులో రెండు శతకాలు సాధించిన ఆసీస్‌ బ్యాటర్ల జాబితాలో చేరిపోయాడు. టాప్‌ ఆర్డర్‌లో మార్కస్‌ హారిశ్‌ (27), డెవిడ్‌ వార్నర్‌ (3), మార్నస్‌ లబుషేన్‌ (29), స్టీవ్‌ స్మిత్‌ (23) విఫలమైనా.. ఉస్మాన్‌ ఖవాజ, కామెరూన్‌ గ్రీన్‌ (74, 122 బంతుల్లో 7 ఫోర్లు, 1 సిక్స్‌) జోడీ ఆస్ట్రేలియాకు రెండో ఇన్నింగ్స్‌లో భారీ స్కోరు అందించారు. 68.5 ఓవర్లలో 265/6 వద్ద ఆస్ట్రేలియా రెండో ఇన్నింగ్స్‌ను డిక్లరేషన్‌ ప్రకటించింది. ఇంగ్లాండ్‌ బౌలర్లలో జాక్‌ లీచ్‌ (4/84) నాలుగు వికెట్ల ప్రదర్శన చేయగా.. మార్క్‌ వుడ్‌ (2/65) రాణించాడు.
ఖవాజ అవుట్‌ : స్కాట్‌ బొలాండ్‌, ఉస్మాన్‌ ఖవాజ... బాక్సింగ్‌ డే టెస్టులో నమ్మశక్యం కాని స్పెల్‌లో ఇంగ్లాండ్‌ను పతనాన్ని శాసించిన పేసర్‌ స్కాట్‌ బొలాండ్‌. సిడ్నీ టెస్టులో రెండు సెంచరీలు నమోదు చేసిన దిగ్గజాల క్లబ్‌లో చేరిన బ్యాటర్‌ ఉస్మాన్‌ ఖవాజ. బ్యాటింగ్‌ విభాగంలో ఉస్మాన్‌ ఖవాజ, బౌలింగ్‌ విభాగంలో స్కాట్‌ బొలాండ్‌ ఇద్దరూ చివరి టెస్టుకు దూరం కానున్నారు. ఫిట్‌నెస్‌, కోవిడ్‌-19, మరే ఇతర కారణాలతో ఈ ఇద్దరు చివరి టెస్టులో ఆడటం లేదు అనుకుంటే పొరపాటే. పేసర్‌ జోశ్‌ హజిల్‌వుడ్‌ స్థానంలో స్కాట్‌ బొలాండ్‌ తుది జట్టులోకి రాగా.. కోవిడ్‌-19 బారిన పడిన ట్రావిశ్‌ హెడ్‌ స్థానంలో ఉస్మాన్‌ ఖవాజ జట్టులోకి వచ్చాడు. తొలి అవకాశంలోనే ఈ ఇద్దరూ అద్వితీయ ప్రదర్శన చేశారు. అయినా యాషెస్‌ చివరి టెస్టుకు అటు జోశ్‌ హజిల్‌వుడ్‌, ఇటు ట్రావిశ్‌ హెడ్‌ అందుబాటులోకి రావటంతో ఈ ఇద్దరిపై వేటు వేసేందుకు సెలక్టర్లు సిద్ధమయ్యారు. బొలాండ్‌, ఉస్మాన్‌లు చిరస్మరణీయ ప్రదర్శనలు చేసినా క్రికెట్‌ ఆస్ట్రేలియా సెలక్షన్‌ ప్రక్రియలో భాగంగా ఈ ఇద్దరూ చివరి టెస్టులో హజిల్‌వుడ్‌, ట్రావిశ్‌ హెడ్‌ల కోసం బెంచ్‌కు పరిమితం కాకతప్పటం లేదు.
స్కోరు వివరాలు :
ఆస్ట్రేలియా తొలి ఇన్నింగ్స్‌ : 416/8 డిక్లేర్డ్‌
ఇంగ్లాండ్‌ తొలి ఇన్నింగ్స్‌ : 294/10
ఆస్ట్రేలియా రెండో ఇన్నింగ్స్‌ : 265/6 డిక్లేర్డ్‌
ఇంగ్లాండ్‌ రెండో ఇన్నింగ్స్‌ : హసీబ్‌ హమీద్‌ నాటౌట్‌ 8, జాక్‌ క్రావ్లీ నాటౌట్‌ 22, ఎక్స్‌ట్రాలు : 0, మొత్తం :(11 ఓవర్లలో) 30.
బౌలింగ్‌ : మిచెల్‌ స్టార్క్‌ 4-0-10-0, పాట్‌ కమిన్స్‌ 4-0-15-0, స్కాట్‌ బొలాండ్‌ 3-1-5-0.
