ఆడిలైడ్‌ : భారత టెన్నిస్‌ స్టార్స్‌ ఆడిలైడ్‌ ఏటీపీ టూర్‌ టైటిల్‌ సొంతం చేసుకున్నారు. మెన్స్‌ సింగిల్స్‌ డబుల్స్‌ స్టార్‌ రోహన్‌ బోపన్న, రామ్‌కుమార్‌ రామనాథన్‌ జోడీ ఆడిలైడ్‌ ఏటీపీ టూర్‌ మెన్స్‌ డబుల్స్‌ విజేతలుగా నిలిచారు. ఆదివారం జరిగిన ఫైనల్లో భారత జోడీ 7-6(8-6), 6-1తో బ్రెజిల్‌, క్రోయేషియా జోడీ మార్సెలో మెలో, ఇవాన్‌ డోడిగ్‌లపై వరుస సెట్లలో గెలుపొందారు. టైబ్రేకర్‌కు దారితీసిన తొలి సెట్‌లో భారత జోడీ 8-6తో పైచేయి సాధించింది. బోపన్న, రామ్‌కుమార్‌లు 9 ఏస్‌లతో చెలరేగగా.. డోడిగ్‌, మెలోలు మూడు ఏస్‌లతో సరిపెట్టుకున్నారు. భారత జోడీ రెండు బ్రేక్‌ పాయింట్లతో మ్యాచ్‌ను తనవైపుకు తిప్పుకుంది. పాయింట్ల పరంగా 64-51తో ఆధిక్యంలో నిలిచిన బోపన్న, రామ్‌కుమార్‌ గేముల పరంగానూ 13-7తో తిరుగులేని ఆధిపత్యం చూపించింది. రెండో సెట్‌ను 6-1తో ఏకపక్షంగా గెల్చుకున్న భారత జోడీ మెన్స్‌ డబుల్స్‌ చాంపియన్స్‌గా అవతరించారు.