- ఐసిసి వన్డే ర్యాంకింగ్స్‌ విడుదల
దుబాయ్‌: టీమిండియా వన్డే మాజీ కెప్టెన్‌ విరాట్‌ కోహ్లి, కెప్టెన్‌ రోహిత్‌ శర్మ తమ తమ ర్యాంకింగ్స్‌ను పదిలం చేసుకున్నారు. అంతర్జాతీయ క్రికెట్‌ కంట్రోల్‌బోర్డు(ఐసిసి) బుధవారం విడుదల చేసిన ర్యాంకింగ్స్‌లో విరాట్‌ కోహ్లీ తన రెండో స్థానాన్ని కాపాడుకున్నాడు. దక్షిణాఫ్రికాతో జరిగిన వన్డే సిరీస్‌లో కోహ్లీ రెండు అర్ధశతకాలతో రాణించడంతో అతని ర్యాంక్‌లో ఎలాంటి మార్పు చోటు చేసుకోలేదు. ఇక సఫారీ టూర్‌కు గాయం కారణంగా దూరమైన రోహిత్‌ శర్మ కూడా తన మూడో స్థానాన్ని కాపాడుకున్నాడు. ఈ జాబితాలో అగ్రస్థానంలో పాకిస్తాన్‌ కెప్టెన్‌ బాబర్‌ ఆజమ్‌ ఉన్నాడు. భారత్‌-సౌతాఫ్రికా వన్డే సిరీస్‌ తర్వాత విడుదలైన ఐసిసి వన్డే ర్యాకింగ్స్‌లో సఫారీ బ్యాటర్స్‌ సత్తా చాటారు. తాజాగా విడుదలైన ర్యాంకింగ్స్‌లో సౌతాఫ్రికా వికెట్‌ కీపర్‌ క్వింటన్‌ డికాక్‌ తన కెరీర్‌ బెస్ట్‌ టాప్‌ 5లో చోటు సంపాదించాడు. మరో బ్యాటర్‌ రాసీ వాన్‌ డర్‌ డస్సెన్‌ కూడా మెరుగైన ర్యాంక్‌ సాధించాడు. కెరీర్‌లోనే తొలిసారి పదో స్థానంలో నిలిచాడు. ఈ సిరీస్‌లో రాణించిన టీమిండియా ఓపెనర్‌ శిఖర్‌ ధావన్‌ ఒక స్థానం మెరుగై 15వ స్థానంలో నిలిచాడు.