- నార్త్‌ఈస్ట్‌ యునైటెడ్‌తో నేడు పోరు
గోవా : ఇండియన్‌ సూపర్‌ లీగ్‌ (ఐఎస్‌ఎల్‌)లో మరో ఆసక్తికర పోరుకు వేళైంది. వరుస విజయాలతో పాయింట్ల పట్టికలో అగ్రస్థానంలో కొనసాగుతున్న హైదరాబాద్‌ ఎఫ్‌సీ నేడు నార్త్‌ఈస్ట్‌ యునైటెడ్‌ ఎఫ్‌సీతో తలపడేందుకు సిద్ధమైంది. సీజన్‌ సాగుతున్న కొద్ది హైదరాబాద్‌ దూకుడు ఊపందుకుంటుండగా.. నార్త్‌ఈస్ట్‌ యునైటెడ్‌ ప్రదర్శన అందుకు భిన్నంగా కనిపిస్తోంది. భీకర ఫామ్‌లో ఉన్న హైదరాబాద్‌ను ఎదుర్కొవటం నేడు ఆ జట్టుకు శక్తికి మించిన పనే కానుంది. ఇదే జోరులో మరో విజయం సాధించి పాయింట్ల పట్టికలో అగ్రస్థానం పటిష్టం చేసుకోవాలనే దిశగా హైదరాబాద్‌ దూసుకెళ్తోంది. హైదరాబాద్‌ ఎఫ్‌సీ తరఫున ఓగ్బాచె, సివెరియా, నిఖిల్‌ పూజారి, అనికేత్‌ జాదవ్‌లకు తోడు జావో విక్టర్‌, జోయల్‌ చియానిస్‌, ఆకాశ్‌ మిశ్రాలు రాణిస్తుండటంతో గోల్స్‌ వర్షం కురుస్తోంది. తిరుగులేని డిఫెన్స్‌, ఎదురులేని ఎటాకింగ్‌తో అదరగొడుతున్న హైదరాబాద్‌ నేడు విజయమే లక్ష్యంగా బరిలోకి దిగుతోంది. హైదరాబాద్‌, నార్త్‌ఈస్ట్‌ యునైటెడ్‌ మ్యాచ్‌ నేడు రాత్రి 7.30 గంటలకు ఆరంభం.