- నార్త్‌ఈస్ట్‌ యునైటెడ్‌పై 5-0 తేడాతో హైదరాబాద్ ఘన విజయం
- ఓగ్బాచె డబుల్‌
- లీగ్‌లో అత్యధిక గోల్స్‌ రికార్డు
- ఇండియన్‌ సూపర్‌ లీగ్‌
గోవా: ఇండియన్‌ సూపర్‌ లీగ్‌(ఐఎస్‌ఎల్‌)లో హైదరాబాద్ ఫుట్‌బాల్‌ క్లబ్‌(హెచ్‌ఎఫ్‌సీ) మరో సూపర్‌ ప్రదర్శన. తమకు ఏ జట్టు సాటిరాదంటూ హెచ్‌ఎఫ్‌సీ చేలరేగిన తీరు అద్భుతం. లీగ్‌లో టాప్‌ జట్లలో ఒకటిగా దూసుకెళుతున్న హెచ్‌ఎఫ్‌సీ తమ సెమీఫైనల్‌ బెర్తును మరింత పక్కా చేసుకుంది. సోమవారం పూర్తి ఏకపక్షంగా సాగిన మ్యాచ్‌లో హెచ్‌ఎఫ్‌సీ 5-0 తేడాతో నార్త్‌ఈస్ట్‌ యునైటెడ్‌పై ఘన విజయం సాధించింది. మ్యాచ్‌లో హెచ్‌ఎఫ్‌సీ తరఫున స్టార్‌ ప్లేయర్‌ ఓగ్బాచె(3ని, 60ని) డబుల్‌ గోల్స్‌ చెలరేగగా, ఆకాశ్‌ మిశ్రా(45ని), నిఖిల్‌ పుజారి(84ని) , ఎడు గార్సియా(88ని) ఒక్కో గోల్‌ చేశారు. ఐఎస్‌ఎల్‌ చరిత్రలో అత్యధిక గోల్స్‌ చేసిన రికార్డును ఒగ్బాచె(49) తన పేరిట లిఖించుకున్నాడు. ఈ విజయంతో హెచ్‌ఎఫ్‌సీ 14 మ్యాచ్‌ల్లో 26 పాయింట్లతో తమ అగ్రస్థానాన్ని మరింత పదిలం చేసుకుంది. మరోవైపు నార్త్‌ఈస్ట్‌ పది పాయింట్లతో పదో స్థానంలో ఉంది.
