- శ్రీలంక సిరీస్‌ షెడ్యూల్‌లో మార్పులు
ముంబయి : భారత సూపర్‌స్టార్‌, మాజీ కెప్టెన్‌ విరాట్‌ కోహ్లి మైలురాయి వందో టెస్టు వేదిక బెంగళూర్‌ నుంచి మొహాలికి మారింది!. వెస్టిండీస్‌తో సిరీస్‌ అనంతరం శ్రీలంకతో భారత్‌ టెస్టు సిరీస్‌ ఆడాల్సి ఉంది. బెంగళూర్‌లో తొలి టెస్టు ప్రణాళిక చేయటంతో పాటు చిన్నస్వామి స్టేడియంలోనే డేనైట్‌ పింక్‌ బాల్‌ టెస్టును సైతం బోర్డు ప్రణాళిక చేసింది. కానీ శ్రీలంక సిరీస్‌ షెడ్యూల్‌లో మార్పులతో తొలి టెస్టు వేదిక పంజాబ్‌ క్రికెట్‌ సంఘం (పీసీఏ) స్టేడియం మొహాలికి మారినట్టు తెలుస్తోంది. శ్రీలంక సిరీస్‌ టీ20లతో ఆరంభం కానుండగా.. తొలి టీ20 లక్నోలో.. చివరి రెండు టీ20లు ధర్మశాలలో నిర్వహిస్తున్నారు. తొలి టెస్టుకు మొహాలి, రెండో టెస్టుకు బెంగళూర్‌ ఆతిథ్యం ఇవ్వనున్నాయి. 14 ఏండ్లు రాయల్‌ చాలెంజర్స్‌ బెంగళూర్‌తో అనుబంధంతో చిన్నస్వామి స్టేడియం విరాట్‌ కోహ్లికి సొంత మైదానమైంది. షెడ్యూల్‌ మార్పులతో విరాట్‌ వందో టెస్టుకు మొహాలి ఆతిథ్యం ఇవ్వనుంది.
