వెల్లింగ్టన్‌ : టీ20 ప్రపంచ చాంపియన్‌ ఆస్ట్రేలియా, టెస్టు ప్రపంచ చాంపియన్‌ న్యూజిలాండ్‌ మధ్య జరగాల్సిన పొట్టి సిరీస్‌ అనూహ్యంగా రద్దుగా ముగిసింది. వచ్చే నెలలో మూడు మ్యాచుల టీ20 సిరీస్‌ కోసం ఆస్ట్రేలియా జట్టు న్యూజిలాండ్‌లో పర్యటించాల్సి ఉంది. 2021 ఐసీసీ టీ20 ప్రపంచకప్‌ ఫైనల్లో న్యూజిలాండ్‌పై మెరుపు విజయంతో తొలిసారి పొట్టి కప్పు సాధించిన కంగారూలు.. ఆ తర్వాత కివీస్‌తో టీ20 పోరులో తలపడలేదు. ప్రపంచకప్‌ ఫైనలిస్ట్‌లు తలపడనున్న టీ20 సిరీస్‌పై అభిమానుల్లో భారీ అంచనాలు నెలకొనగా.. న్యూజిలాండ్‌లో కొత్త కోవిడ్‌ వేరియంట్‌ ఒమిక్రాన్‌ ప్రవేశంతో పరిస్థితులు వేగంగా మారిపోయాయి. కోవిడ్‌-19 కొత్త ఆంక్షలు విధించిన న్యూజిలాండ్‌ ప్రభుత్వం అంతర్జాతీయ సరిహద్దులపై కఠిన ఆంక్షలు విధించింది. దీంతో ప్రస్తుతం ఆస్ట్రేలియాతో టీ20 సిరీస్‌ సాధ్యపడదని న్యూజిలాండ్‌ క్రికెట్‌ బోర్డు ఓ ప్రకటనలో తెలిపింది.