- ప్రైమ్‌ వాలీబాల్‌లో కోల్‌కతపై గెలుపు
హైదరాబాద్‌ : హైదరాబాద్‌ బ్లాక్‌హాక్స్‌ ముచ్చటగా మూడో విజయం నమోదు చేసింది. జోరుమీదున్న కోల్‌కత థండర్‌బోల్ట్స్‌పై 3-2తో గెలుపొంది పాయింట్ల పట్టికలో అగ్రస్థానంలో నిలిచింది. గచ్చిబౌలి ఇండోర్‌ స్టేడియంలో మంగళవారం ఉత్కంఠగా సాగిన మ్యాచ్‌లో హైదరాబాద్‌ బ్లాక్‌హాక్స్‌ 15-8, 13-15, 15-9, 15-12, 8-15తో కోల్‌కతపై గెలుపొందింది. హైదరాబాద్‌ స్పైకర్‌ గురు ప్రశాంత్‌ సూపర్‌ షాట్లతో విరుచుకుపడ్డాడు. మ్యాన్‌ ఆఫ్‌ ది మ్యాచ్‌ ప్రశాంత్‌ జోరుతో తొలి నాలుగు సెట్లలోనే హైదరాబాద్‌ విజయం ఖాయమైంది. నామమాత్రపు చివరి సెట్‌లో కోల్‌కత ఊరట పొందింది. ప్రైమ్‌ వాలీబాల్‌ లీగ్‌లో నేడు చెన్నై, కోచి జట్లు తలపడనున్నాయి.