- మొహాలిలో విరాట్‌ వందో టెస్టు
ముంబయి : ఊహించినట్టుగానే శ్రీలంకతో సిరీస్‌ షెడ్యూల్‌లో బీసీసీఐ పలు మార్పులు చేసింది. విరాట్‌ కోహ్లి కెరీర్‌ వందో టెస్టు అతడి ఐపీఎల్‌ సొంత మైదానం బెంగళూర్‌లో నిర్వహించటం లాంఛనమే అనిపించగా.. కోవిడ్‌-19 పరిస్థితుల దృష్ట్యా షెడ్యూల్‌లో మార్పులు అనివార్యం అయ్యాయి. దీంతో విరాట్‌ కోహ్లి వందో టెస్టు వేదిక మొహాలికి మారగా.. బెంగళూర్‌ డే నైట్‌ గులాబీ బంతి టెస్టుకు ఆతిథ్యం ఇవ్వనుంది. ఈ మేరకు శ్రీలంకతో టీ20, టెస్టు సిరీస్‌ షెడ్యూల్‌ను బీసీసీఐ మంగళవారం విడుదల చేసింది. ఫిబ్రవరి 24న లక్నోలో తొలి టీ20 జరుగనుండగా.. చివరి రెండు టీ20లకు ధర్మశాల వేదిక కానుంది. ఫిబ్రవరి 26, 27న వరుసగా చివరి రెండు టీ20లు నిర్వహించనున్నారు. మొహాలీ టెస్టు మార్చి 4-8న జరుగనుండగా.. బెంగళూర్‌ పింక్‌ బాల్‌ టెస్టు మార్చి 12-16న నిర్వహించనున్నారు. వెస్టిండీస్‌తో టీ20 సిరీస్‌ అనంతరం శ్రీలంకతో సిరీస్‌ కోసం టీమ్‌ ఇండియా నేరుగా లక్నోకు చేరుకోనుంది.