- ప్రైమ్‌ వాలీబాల్‌లో చెన్నైపై గెలుపు
హైదరాబాద్‌ : ఆద్యంతం ఉత్కంఠగా సాగిన కోచి బ్లూస్పైకర్స్‌, చెన్నై బ్లిట్జ్‌ మ్యాచ్‌లో కోచి బ్లూస్పైకర్స్‌ విజయం సాధించింది. గచ్చిబౌలి ఇండోర్‌ స్టేడియంలో బుధవారం జరిగిన లీగ్‌ మ్యాచ్‌లో 15-12, 15-11, 14-15, 12-15, 15-10తో కోచి మెరుపు విజయం సాధించింది. తొలి రెండు సెట్లలో చెన్నైపై పైచేయి సాధించిన కోచి.. మూడో సెట్‌లోనే ముగించే అవకాశాన్ని తృటిలో చేజార్చుకుంది. వరుసగా రెండు సెట్లు గెలుపొందిన చెన్నై మ్యాచ్‌ను నిర్ణయాత్మక ఐదో సెట్‌కు తీసుకెళ్లింది. కోచి స్పైకర్‌ కాడీ కాడ్‌వెల్‌ అద్భుత ప్రదర్శనతో కోచి ఐదో సెట్‌ను 15-10తో అలవోకగా గెల్చుకుంది. ప్రైమ్‌ వాలీబాల్‌ లీగ్‌లో నేడు రెండు మ్యాచులు జరుగనున్నాయి. తొలి మ్యాచ్‌లో కాలికట్‌, చెన్నై తలపడనుండగా.. రెండో మ్యాచ్‌లో అహ్మదాబాద్‌, బెంగళూర్‌ పోటీపడనున్నాయి.