- విజేతలకు బహుమతులు అందజేత
హైదరాబాద్ : కేసీఆర్‌ సేవా దళం ఆధ్వర్యంలో భారీ ఎత్తున నిర్వహించిన క్రికెట్‌ టోర్నీ విజేతలకు బహుమతులు ప్రధానం చేశారు. సుమారు 400 జట్లు పోటీపడిన మెగా టోర్నీ సెమీఫైనల్స్‌, ఫైనల్స్‌ ఎల్బీ స్టేడియంలో నిర్వహించారు. ఫైనల్లో హైదరాబాద్‌పై హార్డ్‌కోర్‌ జట్టు మూడు పరుగుల తేడాతో గెలుపొందింది. రాష్ట్ర మంత్రి మహమూద్‌ అలీ, రాష్ట్ర సమాచార కమిషనర్‌ డా. మహ్మద్‌ అమీర్‌ ముఖ్య అతిథులుగా హాజరై విజేతలకు బహుమతులు ప్రదానం చేశారు. అంతకుమందు ఎగ్జిబిషన్‌ గ్రౌండ్‌ నుంచి ఎల్బీ స్టేడియం వరకు కెసిఆర్‌ సేవా దళం భారీ ర్యాలీ నిర్వహించింది. మంత్రి మహమూద్‌ అలీతో కలిసి మహ్మద్‌ అమీర్‌లు బెలూన్లు ఎగరేసి కెసిఆర్‌ పుట్టినరోజు కేక్‌ కట్‌ చేశారు. అనంతరం ఎల్బీ స్టేడియంలో అన్నదాన కార్యక్రమం నిర్వహించారు. రాష్ట్ర ముఖ్యమంత్రి కె. చంద్రశేఖర్‌ రావు పుట్టినరోజు సందర్భంగా నిర్వహించిన ఈ టోర్నీ ముగింపు వేడుకలకు తెలంగాణ బెవరేజెస్‌ కార్పోరేషన్‌ చైర్మన్‌ గజ్జెల నగేశ్‌, టిఐఐసి చైర్మన్‌ బాలమల్లు, పౌర సరఫరాల కార్పోరేషన్‌ చైర్మన్‌ మారెడ్డి శ్రీనివాస్‌ రెడ్డి హాజరయ్యారు.
