దుబాయ్: దుబాయ్ ఓపెన్‌ మాస్టర్స్‌ టెన్నిస్‌ టోర్నీలో టాప్‌సీడ్‌, నొవాక్‌ జకోవిచ్‌ శుభారంభం చేశాడు. మంగళవారం జరిగిన తొలిరౌండ్‌ పోటీలో జకోవిచ్‌ 6-3, 6-3తేడాతో మసెట్టి(ఇటలీ)ని వరుససెట్లలో ఓడించాడు. ఆస్ట్రేలియన్‌ ఓపెన్‌ గ్రాండ్‌స్లామ్‌కు కోవిడ్‌-19 టీకా సర్టిఫికెట్‌ లేని కారణంగా టోర్నీ ముందే అర్ధాంతరంగా వైదొలిగిన జకోవిచ్‌.. ఆ తర్వాత బరిలోకి దిగిన తొలి టోర్నమెంట్‌ ఇదే. ఇతర పోటీల్లో ఆండీ ముర్రె(ఇంగ్లండ్‌) 6-7(4-7), 6-3, 7-5తేడాతో కానెల్‌(ఆస్ట్రేలియా)ను, 5వ సీడ్‌ హుర్క్రాజ్‌(పోలండ్‌) 6-3, 6-1తో బబ్లిక్‌(కజకిస్తాన్‌)ను చిత్తుచేశాడు. మరో పోటీలో 4వ సీడ్‌ సిన్నర్‌(ఇటలీ) 4-6, 7-6(8-6), 6-3తో డావిడోవిచ్‌(స్పెయిన్‌)ను ఓడించి రెండోరౌండ్‌లోకి ప్రవేశించారు.
బొప్పన్న జోడీకి నిరాశ..
   పురుషుల డబుల్స్‌లో భారత్‌కు చెందిన ఆర్‌ బొప్పన్న-కరక్ట్సేవ్‌(రష్యా) జోడీ తొలిరౌండ్‌లోనే ఇంటిదారిపట్టింది. మంగళవారం జరిగిన తొలిరౌండ్‌ పోటీలో బొప్పన్న జోడీ 2-6, 6-3, 5-10తేడాతో టాప్‌సీడ్‌ పావిక్‌-మెక్టిక్‌(క్రొయేషియా) జోడీ చేతిలో ఓటమిపాలైంది. భారత్‌కే చెందిన రామ్‌నాథన్‌-మైనేని జోడీ తొలిరౌండ్‌ మ్యాచ్‌ ఆడాల్సి ఉంది.