దుబాయ్: అంతర్జాతీయ క్రికెట్‌మండలి(ఐసిసి) బుధవారం ప్రకటించిన టి20 ర్యాంకింగ్స్‌లో టీమిండియా బ్యాటర్స్‌ సూర్యకుమార్‌ యాదవ్‌, వెంకటేష్‌ అయ్యర్‌ మెరుగుపరుచుకున్నారు. వెస్టిండీస్‌తో జరిగిన మూడు మ్యాచ్‌ల టీ20 సిరీస్‌లో అద్భుతమైన ప్రదర్శనలకు గాను ఈ ఇద్దరు ర్యాంకింగ్స్‌లో ఒక్కసారిగా మెరుగయ్యాయి. ఈ సిరీస్‌లో టాప్‌ స్కోరర్‌గా నిలిచిన సూర్యకుమార్‌ 35 స్థానాలు ఎగబాకి 21వ స్థానానికి చేరుకోగా... వెంకటేష్‌ అయ్యర్‌ ఏకంగా 203 స్థానాలు మెరుగుపర్చుకుని 115వ స్థానానికి చేరుకున్నాడు. ఈ జాబితాలో టీమిండియా వైస్‌ కెప్టెన్‌ కేఎల్‌ రాహుల్‌ రెండు స్థానాలు దిగజారి ఆరో స్థానానికి పడిపోగా, మాజీ కెప్టెన్‌ విరాట్‌ కోహ్లి 10వ స్థానాన్ని నిలబెట్టుకున్నాడు. పాక్‌ ఆటగాళ్లు బాబర్‌ ఆజమ్‌, మహ్మద్‌ రిజ్వాన్‌లు తొలి రెండు స్థానాల్లో కొనసాగుతున్నారు. ఇక బౌలర్లు, ఆల్‌ రౌండర్ల జాబితాలో భారత్‌కు చెందిన ఏ ఒక్క క్రికెటరూ టాప్‌-10లో చోటు దక్కించుకోలేదు. బౌలర్ల విభాగంలో మాత్రం భువనేశ్వర్‌ కుమార్‌ 20వ ర్యాంక్‌లో ఉన్నాడు.