- నేడు శ్రీలంకతో తొలి టి20
- రా.7.00 గం||ల నుంచి స్టార్‌స్పోర్ట్స్‌లో
లక్నో: వెస్టిండీస్‌తో జరిగిన వన్డే, టి20 సిరీస్‌లను క్లీన్‌స్వీప్‌ చేసిన భారత జట్టు ఇక శ్రీలంకతో సమరానికి సిద్ధమైంది. ఇరుజట్ల మధ్య మూడు టి20ల సిరీస్‌తోపాటు, మరో రెండు టెస్ట్‌ మ్యాచ్‌ల సిరీస్‌ జరగనుంది. మూడు టి20ల సిరీస్‌లో భాగంగా గురువారం జరిగే తొలి మ్యాచ్‌కు లక్నో ఆతిథ్యమివ్వనుంది. దుర్భేద్య ఫామ్‌లో ఉన్న టీమిండియాను లంక జట్టు నిలువరించడం కష్టమే అయినా.. ఏమాత్రం అజాగ్రత్తగా వహించినా.. పర్యాటక జట్టు చెలరేగడం ఖాయం. లంక జట్టు ఇటీవల ఆస్ట్రేలియా పర్యటనకు వెళ్లి ఘోర పరాజయాన్ని మూటగట్టుకుంది. దీంతో కంగారు జట్టుపై ఎదురైన పరాభవానికి భారత్‌పై బదులు తీర్చుకోవాలని ఆ జట్టు చూస్తోంది. తొలి టి20కి లక్నో ఆతిథ్యమివ్వనుండగా.. రెండు, మూడు మ్యాచ్‌లు ధర్మశాలలో జరగనున్నాయి. లంకతో సిరీస్‌కు మాజీ కెప్టెన్‌ విరాట్‌ కోహ్లీ, రిషభ్‌ పంత్‌లకు బిసిసిఐ ఇప్పటికే విశ్రాంతినిచ్చింది. మరో స్టార్‌ బ్యాటర్‌ కేఎల్‌ రాహుల్‌ కూడా ఈ సిరీస్‌కు అందుబాటులో లేడు.. కాగా, లంక బౌలర్‌ వానింది హసరంగ కూడా కరోనా నుంచి పూర్తిగా కోలుకోలేదని, అతను భారత్‌తో సిరీస్‌లో ఆడటం లేదని శ్రీలంక క్రికెట్‌ బోర్డు తాజాగా ప్రకటించింది.
సూర్యకుమార్‌, దీపక్‌ చాహర్‌ ఔట్‌..
శ్రీలంకతో సిరీస్‌కు ముందు టీమిండియాకు గట్టి ఎదురుదెబ్బ తగిలింది. ఫామ్‌లో ఉన్న సూర్యకుమార్‌ యాదవ్‌, దీపక్‌ చాహర్‌ గాయాల కారణంగా లంకతో సిరీస్‌కు దూరమౌతున్నట్లు బిసిసిఐ బుధవారం వెల్లడించింది. సూర్యకుమార్‌ యాదవ్‌ విండీస్‌తో జరిగిన ఆఖరి టీ20లో ఆకాశమే హద్దుగా చెలరేగాడు. ఆ సందర్భంగా ఫీల్డింగ్‌ చేస్తూ గాయపడ్డాడని, ఇంకా కోలుకోలేదని బిసిసిఐ ఓ ప్రకటనలో వెల్లడించింది. తాజాగా దీపక్‌ చాహర్‌ కూడా గాయపడడంతో వీరిద్దరినీ బెంగళూరులోని నేషనల్‌ క్రికెట్‌ అకాడమీకి పంపినట్లు బిసిసిఐ ఆ ప్రకటనలో పేర్కొంది.
భారత జట్టు: రోహిత్‌ శర్మ(కెప్టెన్‌), రుతురాజ్‌ గైక్వాడ్‌, ఇషన్‌ కిషన్‌(వికెట్‌ కీపర్‌), శ్రేయస్‌ అయ్యర్‌, వెంకటేశ్‌ అయ్యర్‌, దీపక్‌ హుడా, జస్ప్రీత్‌ బుమ్రా, భువనేశ్వర్‌ కుమార్‌, హర్షల్‌ పటేల్‌, మహ్మద్‌ సిరాజ్‌, సంజు శాంసన్‌, రవీంద్ర జడేజా, చహల్‌, బిష్ణోరు, కుల్దీప్‌ యాదవ్‌, అవేష్‌ ఖాన్‌.
శ్రీలంక జట్టు: దసున్‌ శనక(కెప్టెన్‌), నిసాంక, కుశాల్‌ మెండిస్‌, అసలంక, చండిమాల్‌, దనుష్క గుణతిలక, కమిల్‌ మిశార, జనిత్‌ లియనగె, చమిక కరుణరత్నే, చమీరా, లాహిరు కుమార, బినుర ఫెర్నాండో, షిరన్‌ ఫెర్నాండో, మహీశ్‌ తీక్షణ, జెఫ్రె వండెర్సే, ప్రవీణ్‌ జయవిక్రమ, అషియాన్‌ డానియెల్‌.
