- ముంబయిలో 55, పూణేలో 15 మ్యాచ్‌లు
- ఫ్రాంచైజీల అసంతృప్తి
ముంబయి: ఇండియన్‌ ప్రిమియర్‌ లీగ్‌(ఐపిఎల్‌) 2022కు సంబంధించి కీలక సమాచారం వెలువడింది. మహరాష్ట్రలోనే ఐపిఎల్‌ లీగ్‌ మ్యాచ్‌లన్నీ జరగనున్నాయి. గురువారం జరిగిన ఐపిఎల్‌ గవర్నింగ్‌ కౌన్సిల్‌ సమావేశంలో ఐపిఎల్‌ లీగ్‌ ప్రారంభం తేదీ, వేదికలను ఖరారు చేసినట్లు ఓ వెబ్‌సైట్‌ వెల్లడించింది. లీగ్‌ దశలో జరిగే మొత్తం 70మ్యాచుల్లో 55మ్యాచ్‌లు ముంబయిలోని వాంఖడే, బ్రబౌర్న్‌, డివై పాటిల్‌ స్టేడియాల్లో.. మిగిలిన 15మ్యాచ్‌లు పూణేలోని ఎంసిఏ స్టేడియంలో జరగనున్నట్లు పేర్కొంది. దీంతో వేదికల ఖరారుపై మిగతా ఫ్రాంచైజీలు అసంతృప్తిగా ఉన్నట్లు సమాచారం. మార్చి 27న తొలుత ఐపిఎల్‌ సీజన్‌-15ను ప్రారంభించాలని బిసిసిఐ భావించినా.. లీగ్‌ అధికారిక బ్రాడ్‌ కాస్టర్‌ స్టార్‌ ఇండియా కోరిక మేరకు ఒక రోజు ముందు మార్చి 26నే ఖరారు చేసినట్లు సమాచారం.