- జంషెడ్‌పూర్‌తో ఐఎస్‌ఎల్‌ పోరు నేడు
గోవా : ఇండియన్‌ సూపర్‌ లీగ్‌ (ఐఎస్‌ఎల్‌)లో మరో రసవతర్త పోరుకు రంగం సిద్ధమైంది. పాయింట్ల పట్టికలో తొలి రెండు స్థానాల్లో నిలిచిన జట్లు ముఖాముఖి సమరానికి సై అంటున్నాయి. అగ్రస్థానంలో ఉన్న హైదరాబాద్‌తో జంషెడ్‌పూర్‌ నేడు తలపడనుంది. 18 మ్యాచుల్లో 35 పాయింట్లతో హైదరాబాద్‌ ఉండగా.. 17 మ్యాచుల్లో 34 పాయింట్లతో జంషెడ్‌పూర్‌ వెంబడిస్తోంది. టాప్‌-4లో చోటు ఖాయం చేసుకున్న హైదరాబాద్‌ నేడు మరో విజయంతో అగ్రస్థానం పదిలం చేసుకోవాలని భావిస్తోంది. జంషెడ్‌పూర్‌తో గత మూడు ఐఎస్‌ఎల్‌ మ్యాచుల్లో విజయం సాధించలేని హైదరాబాద్‌ నేడు ఆ లోటు పూడ్చాలని అనుకుంటోంది. స్టార్‌ ఆటగాడు ఒగ్బాచే మెరుపు ఫామ్‌లో ఉన్నాడు. 17 మ్యాచుల్లో 17 గోల్స్‌తో లీగ్‌లోనే అత్యధిక గోల్స్‌ చేసిన ఆటగాడిగా కొనసాగుతున్నాడు. బ్యాక్‌లైన్‌, మిడ్‌ఫీల్డ్‌లో ఉన్న బలంగా కనిపిస్తున్న హైదరాబాద్‌కు ఎటాకింగ్‌లో ఒగ్బాచే అదనపు బలం. ఒగ్బాచేను నిలువరిస్తేనే జంషెడ్‌పూర్‌ గెలుపు ఆశలు సజీవంగా నిలుపుకోగలదు. కోవిడ్‌ కారణంగా వాయిదా పడిన రౌండ్‌-12 మ్యాచ్‌ నేటికి రీ షెడ్యూల్‌ చేశారు. హైదరాబాద్‌, జంషెడ్‌పూర్‌ నేడు రాత్రి 7.30 గంటలకు ఆరంభం.