- ఐసీసీ టెస్టు ర్యాంకింగ్స్‌
దుబాయ్ : బెంగళూర్‌లో శ్రీలంకపై గులాబీ టెస్టులో ఐదు వికెట్ల ప్రదర్శనతో అదరగొట్టిన భారత పేస్‌ దళపతి జశ్‌ప్రీత్‌ బుమ్రా ఐసీసీ టెస్టు ర్యాంకింగ్స్‌లో దూసుకెళ్లాడు. బౌలర్ల జాబితాలో ఆరు స్థానాలు ఎగబాకిన జశ్‌ప్రీత్‌ బుమ్రా నం.4గా నిలిచాడు. మరోవైపు బ్యాటింగ్‌ జాబితాలో స్టార్‌ బ్యాటర్‌ విరాట్‌ కోహ్లి పతనం కొనసాగుతూనే ఉంది!. ఓ స్థానం పడిపోయిన విరాట్‌ కోహ్లి 9వ స్థానంలో నిలిచాడు. బెంగళూర్‌ టెస్టులో 23, 13 పరుగులే చేసిన విరాట్‌ కోహ్లి.. కెరీర్‌లో సుదీర్ఘ విరామం అనంతరం బ్యాటింగ్‌ సగటులో 50 దిగువకు వచ్చాడు. కెప్టెన్‌ రోహిత్‌ శర్మ ఆరో స్థానం నిలుపుకున్నాడు. రెండు అర్థ శతకాలు బాదిన శ్రేయస్‌ అయ్యర్‌ ఏకంగా 40 స్థానాలు మెరుగయ్యాడు. కెరీర్‌ ఉత్తమ 37వ ర్యాంక్‌ సాధించాడు. ఆల్‌రౌండర్ల జాబితాలో రవీంద్ర జడేజా అగ్రస్థానం కోల్పోయాడు. జేసన్‌ హోల్డర్‌ తిరిగి నం.1గా నిలిచాడు. అశ్విన్‌, షకిబ్‌, బెన్‌ స్టోక్స్‌లు టాప్‌-5లో నిలిచారు.