హైదరాబాద్: సన్‌రైజర్స్‌ హైదరాబాద్ (ఎస్‌ఆర్‌హెచ్‌) జట్టు కొత్త జెర్సీని ఆవిష్కరించింది. పాత జెర్సీకి వీడ్కోలు పలికిన ఈ ఫ్రాంచైజీ పూర్తి ఆరెంజ్‌ కలర్‌లో కొత్త జెర్సీని విడుదల చేసింది. సన్‌రైజర్స్‌ కెప్టెన్‌ కేన్‌ విలియమ్సన్‌ ఈ జెర్సీలో ఉన్న ఫొటోను గురువారం రాత్రి ట్వీట్‌ చేసింది. 'ఆరెంజ్‌ ఆర్మర్‌లో కెప్టెన్‌ విలియమ్సన్‌' అంటూ ట్యాగిచ్చింది. దీంతో కొంతమంది అభిమానులు సూపర్‌గా ఉందని కామెంట్లు చేస్తున్నారు. ఏదేమైనా ఈ కొత్త జెర్సీతో అయినా జట్టు ఎస్‌ఆర్‌హెచ్‌ జట్టు టైటిల్‌ సాధించాలని అభిమానులు ఆశిస్తున్నారు. యుఏఇ వేదికగా జరిగిన ఐపిఎల్‌లో సన్‌రైజర్స్‌ చెత్త ప్రదర్శనతో పాయింట్ల పట్టికలో అట్టడుగున నిలిచిన సంగతి తెలిసిందే. డేవిడ్‌ వార్నర్‌ను అర్ధాంతరంగా కెప్టెన్సీ నుంచి తప్పించడం, ఆ తర్వాత జట్టు నుంచి తప్పించడంతో వార్నర్‌ తీవ్ర ఇబ్బందులు పడ్డాడు. ఇక ఈ ఏడాది సైమన్‌ కటిచ్‌ను అసిస్టెంట్‌ కోచ్‌గా నియమించగా.. సీజన్‌ ఆరంభానికి ముందే అతడు రాజీనామా చేశాడు. అయితే కోచింగ్‌ విషయంలో మాత్రం మిగతా జట్లతో పోలిస్తే సన్‌రైజర్స్‌ బలంగానే ఉందని చెప్పాలి. బ్యాటింగ్‌ కోచ్‌గా బ్రయాన్‌ లారా, బౌలింగ్‌ కోచ్‌గా డేల్‌ స్టెయిన్‌, స్పిన్‌ కోచ్‌ అండ్‌ స్ట్రాటజీ కోచ్‌గా ముత్తయ్య మురళీధరన్‌తోపాటు హెడ్‌ కోచ్‌గా టామ్‌ మూడీ ఈ జట్టుకు సేవలందిస్తున్నారు.
