- క్వార్టర్స్‌లో కశ్యప్‌పై ప్రణరు పైచేయి
- స్విస్‌ ఓపెన్‌ బ్యాడ్మింటన్‌
బసెల్‌ : భారత బ్యాడ్మింటన్‌ స్టార్‌ క్రీడాకారిణి, తెలుగు తేజం పి.వి సింధు సీజన్‌ తొలి టైటిల్‌ దిశగా అడుగులు వేస్తోంది. స్విస్‌ ఓపెన్‌ మహిళల సింగిల్స్‌ విభాగంలో పి.వి సింధు ఆకట్టుకునే విజయంతో సెమీఫైనల్లోకి ప్రవేశించింది. 36 నిమిషాల క్వార్టర్‌ఫైనల్‌ సమరంలో ఐదో సీడ్‌ కెనడా షట్లర్‌ మిచెలీ లీపై వరుస గేముల్లో గెలుపొందిన సింధు సెమీస్‌కు చేరుకుంది. 21-10, 21-19తో రెండో సీడ్‌ సింధు అలవోక విజయం సాధించింది. నేడు ఫైనల్లో బెర్త్‌ కోసం థారులాండ్‌ అమ్మాయి సుపనిదతో సింధు పోటీపడనుంది. వరల్డ్‌ నం.29 సుపనిదపై సింధు 2-1తో మెరుగైన ముఖాముఖి రికార్డు కలిగి ఉంది. పురుషుల సింగిల్స్‌లో హెచ్‌.ఎస్‌ ప్రణరు సైతం సెమీఫైనల్లో కాలుమోపాడు. సహచర సీనియర్‌ షట్లర్‌ పారుపల్లి కశ్యప్‌పై వరుస గేముల్లో విజయం సాధించిన ప్రణయ్.. సుదీర్ఘ విరామం అనంతరం టైటిల్‌ పోరులో పోటీపడేందుకు సిద్ధమవుతున్నాడు. మెన్స్‌ సింగిల్స్‌ క్వార్టర్‌ఫైనల్లో 21-16, 21-16తో పారుపల్లి కశ్యప్‌పై ప్రణరు సాధికారిక విజయం సాధించాడు.