- రెండో ఇన్నింగ్స్‌లో 53పరుగులకే కుప్పకూల్చిన బంగ్లాదేశ్‌
డర్బన్‌: తొలి టెస్టులో దక్షిణాఫ్రికా జట్టు ఘన విజయం సాధించింది. 274 పరుగుల లక్ష్యంతో బరిలో దిగిన బంగ్లాదేశ్‌ కేశవ్‌ మహరాజ్‌(7/32), సిమొన్‌(3/21)దెబ్బకు 53పరుగులకే ఆలౌటైంది. దీంతో బంగ్లాదేశ్‌ జట్టు టెస్టు క్రికెట్‌ చరిత్రలో రెండో అత్యల్ప స్కోరును ఆలౌటైనట్లయ్యింది. ఓవర్‌నైట్‌ స్కోర్‌ 3 వికెట్ల నష్టానికి 11 పరుగులతో సోమవారం రెండో ఇన్నింగ్స్‌ను కొనసాగించిన బంగ్లా జట్టు 53 పరుగులకే కుప్పకూలింది. నజ్ముల్‌ హొసైన్‌(26), తస్కిన్‌(14) మాత్రమే రెండంకెల స్కోర్‌ను నమోదు చేసారు. బంగ్లాజట్టు ఇంతకుముందు 2018లో వెస్టిండీస్‌తో జరిగిన టెస్టులో 43 పరుగులకే ఆలౌటై తొలుత ఈ చెత్త రికార్డు మూటగట్టుకుంది. మ్యాన్‌ ఆఫ్‌ ది మ్యాచ్‌ కేశవ్‌ మహరాజ్‌కు లభించగా.. రెండో, ఆఖరి టెస్ట్‌ 8నుంచి పోర్ట్‌ ఎలిజెబెత్‌ వేదికగా జరగనుంది.