ముంబయి: ఢిల్లీ-పంజాబ్‌ జట్ల మధ్య బుధవారం మహరాష్ట్ర క్రికెట్‌ అసోసియేషన్‌(ఎంసిఏ)లో జరగాల్సిన మ్యాచ్‌ వేదికలో మార్పు చోటుచేసుకుంది. షెడ్యూల్‌ ప్రకారం పుణేలో 20న జరగాల్సిన మ్యాచ్‌ని ముంబయిలో నిర్వహించాలని నిర్ణయించినట్టు బిసిసిఐ ప్రకటించింది. దిల్లీ బందంలో ఐదు పాజిటివ్‌ కేసులు నమోదైన కారణంగా వేదికను మార్పు చేసినట్టు వెల్లడించిన బీసీసీఐ.. సుదూర బస్సు ప్రయాణంలో ఎలాంటి ఇబ్బందులు తలెత్తకుండా ఉండేలా ముందుజాగ్రత్తగా ఈ నిర్ణయం తీసుకున్నట్టు తెలిపింది. ప్యాట్రిక్‌(ఫిజియోథెరపిస్ట్‌)కు ఈ నెల 15న కొవిడ్‌ పాజిటివ్‌గా నిర్ధారణ కాగా.. చేతన్‌కుమార్‌ (స్పోర్ట్స్‌ మసాజ్‌ థెరపిస్ట్‌)కు ఏప్రిల్‌ 16న, మిచెల్‌ మార్ష్‌(ఆటగాడు), డాక్టర్‌ అభిజిత్‌ సాల్వి (జట్టు వైద్యుడు), ఆకాశ్‌ మానె (సోషల్‌ మీడియా కంటెంట్‌ టీం సభ్యుడు)కు ఏప్రిల్‌ 18న కరోనా పాజిటివ్‌గా తేలిందని బీసీసీఐ పేర్కొంది. వీరంతా ప్రస్తుతం ఐసోలేషన్‌లో, వైద్యుల పర్యవేక్షణలో ఉన్నట్టు తెలిపింది.
