- లీగ్‌లలో కొనసాగుతానంటూ ప్రకటన
ముంబయి: వెస్టిండీస్‌ పరిమిత ఓవర్ల కెప్టెన్‌ కీరన్‌ పొలార్డ్‌ అంతర్జాతీయ క్రికెట్‌కు వీడ్కోలు పలికాడు. అన్ని ఫార్మాట్ల నుంచి వైదొలుగుతున్నట్లు ప్రకటించాడు. కానీ టి20, టి10 లీగ్‌లలో కొనసాగుతానని పొలార్డ్‌ స్పష్టం చేశాడు. 'అంతర్జాతీయ క్రికెట్‌ నుంచి వీడ్కోలు పలికేందుకు నిర్ణయించుకున్నా. పదేళ్ల వయసులో విండీస్‌ జట్టు తరఫున ఆడాలని కలలు కన్నా. జాతీయ జట్టుకు 15ఏళ్ల పాటు ప్రాతినిధ్యం వహించడం గర్వంగా భావిస్తున్నా' అని ఇన్‌స్టాగ్రామ్‌ వేదికగా పేర్కొన్నాడు. 2007లో వన్డేల్లో అరంగేట్రం చేసిన పొలార్డ్‌ విధ్వంసకర ఆల్‌రౌండర్‌గా గుర్తింపు పొందాడు. 34ఏళ్ల పొలార్డ్‌ మొత్తం 123 వన్డేల్లో 55 వికెట్లు పడగొట్టి, 2,706 పరుగులు చేశాడు. 101టీ20ల్లో 1,569పరుగులు, 42 వికెట్లు తీసాడు. చివరిసారిగా భారత్‌తో జరిగిన సిరీస్‌లో ఆడాడు.