- ఫైనల్లో సాథియాన్‌, మౌమాదాస్‌లపై గెలుపు
న్యూఢిల్లీ: సీనియర్‌ టేబుల్‌ టెన్నిస్‌ ఆటగాడు ఆచంట శరత్‌ కమల్‌ 10వ జాతీయ సీనియర్‌ టైటిల్‌ విజేతగా నిలిచాడు. పిఎస్‌పిబి తరఫున ఆడిన శరత్‌ సోమవారం జరిగిన ఫైనల్లో 7-11, 12-10, 9-11, 7-11, 12-10, 11-9, 11-6 గేమ్‌ల తేడాతో పిఎస్‌పిబికే చెంది జి. సాథియాన్‌ను ఓడించాడు. 7 గేమ్‌ల మ్యాచ్‌లో తొలి గేమ్‌ను ఓడిన శరత్‌.. రెండో గేమ్‌లో గెలిచాడు. ఆ తర్వాత వరుసగా రెండు గేమ్‌లలో ఓటమిపాలవ్వడంతో 1-3తో వెనుకబడ్డాడు. ఈ క్రమంలో వరుసగా మూడు గేమ్‌లను గెలిచి టాప్‌సీడ్‌ సాథియాన్‌కు షాక్‌ ఇచ్చాడు. ఇక మహిళల విభాగంలో ఆర్‌బిఐకు చెందిన ఆకుల శ్రీజ ఫైనల్లో మౌమాదాస్‌(పిఎస్‌పిబి)ని ఓడించి టైటిల్‌ను సాధించింది. ఫైనల్లో శ్రీజ 1-8, 11-13, 12-10, 11-8, 11-6తో ఐదుసార్లు జాతీయ ఛాంపియన్‌ మౌమాదాస్‌ను ఓడించింది.