- లక్ష్యసేన్‌ ఔట్‌
- ఆసియా బ్యాడ్మింటన్‌ ఛాంపియన్‌షిప్స్‌
మనీల(ఫిలిప్పీన్స్‌): ఆసియా బ్యాడ్మింటన్‌ ఛాంపియన్‌షిప్‌లో భారత టాప్‌సీడ్‌ షట్లర్‌ లక్ష్యసేన్‌ తొలిరౌండ్‌లోనే ఇంటిదారి పట్టాడు. బుధవారం జరిగిన పురుషుల సింగిల్స్‌ తొలిరౌండ్‌ పోటీలో లక్ష్యసేన్‌ 12-21, 21-10, 21-19 తేడాతో లీ-షి-పెంగ్‌(చైనా) చేతిలో ఓటమిపాలయ్యాడు. ఇక మహిళల సింగిల్స్‌లో సైనా నెహ్వాల్‌, పివి సింధు శుభారంభం చేశారు. పివి సింధు 18-21, 27-25, 21-9పాయింట్ల తేడాతో చైనీస్‌ తైపీకి చెందిన పి-యు-పో చేతిలో పోరాడి నెగ్గింది. మరో పోటీలో మాల్విక బన్సోద్‌ 21-9, 17-21, 24-26తో యు-జి-మిన్‌ చేతిలో తృటిలో పరాజయంపాలైంది. మూడో గేమ్‌లో ఇరు వురు షట్లర్లు పోటాపోటీగా తలపడ్డారు. మరో పోటీలో సైనా నెహ్వాల్‌ 21-15, 17-21, 21-13 తేడాతో కొరియాకు చెందిన సిమ్‌-యు-జిన్‌పై పోరాడి నెగ్గింది. ఇక టాప్‌సీడ్‌ కెంటో మొమొటో 21-17, 17-21, 7-21తేడాతో ఇండోనేషియాకు చెందిన చికో-ఆరో చేతిలో అనూహ్యంగా ఓటమిపాలయ్యాడు.