- అజేయ 92 పరుగులతో చెలరేగిన వార్నర్‌
- సిక్సర్లతో రోవ్‌మాన్‌ పావెల్‌ విశ్వరూపం
- సన్‌రైజర్స్‌పై ఢిల్లీ క్యాపిటల్స్‌ 207/3
నవతెలంగాణ-ముంబయి
             'సన్‌రైజర్స్‌ హైదరాబాద్‌పై శతకం బాదాలని ఓ అభిమాని కోరగా.. ప్రయత్నిస్తానని సమాధానం ఇచ్చిన' డెవిడ్‌ వార్నర్‌.. ముంబయి బ్రబౌర్న్‌ స్టేడియంలో అన్నంత పని చేసేలా కనిపించాడు!. సన్‌రైజర్స్‌ హైదరాబాద్‌తో మ్యాచ్‌లో ఆ జట్టు మాజీ కెప్టెన్‌ డెవిడ్‌ వార్నర్‌ (92 నాటౌట్‌, 58 బంతుల్లో 12 ఫోర్లు, 3 సిక్స్‌లు) అదరగొట్టాడు. ఇన్నింగ్స్‌ అసాంతం దూకుడుగా ఆడిన డెవిడ్‌ వార్నర్‌ అజేయ అర్థ సెంచరీతో ఢిల్లీ క్యాపిటల్స్‌కు భారీ స్కోరు అందించాడు. డెవిడ్‌ వార్నర్‌కు రోవ్‌మాన్‌ పావెల్‌ (67 నాటౌట్‌, 35 బంతుల్లో 3 ఫోర్లు, 6 సిక్స్‌లు) విశ్వరూపం తోడైంది. కెప్టెన్‌ రిషబ్‌ పంత్‌ (26) సైతం హ్యాట్రిక్‌ సిక్సర్లతో అలరించగా.. తొలుత బ్యాటింగ్‌ చేసిన ఢిల్లీ క్యాపిటల్స్‌ 20 ఓవర్లలో 3 వికెట్లకు 207 పరుగుల భారీ స్కోరు నమోదు చేసింది. సన్‌రైజర్స్‌ హైదరాబాద్‌ స్పీడ్‌స్టర్‌ ఉమ్రాన్‌ మాలిక్‌ (0/52) పరుగులు ఇవ్వటంలో అర్థ సెంచరీ కొట్టేశాడు. సీన్‌ అబాట్‌ సైతం 47 పరుగులు సమర్పించుకున్నాడు.
వార్నర్‌ దూకుడు : టాస్‌ నెగ్గిన సన్‌రైజర్స్‌ హైదరాబాద్‌ తొలుత ఫీల్డింగ్‌ ఎంచుకుంది. స్వింగ్‌స్టర్‌ భువనేశ్వర్‌ కుమార్‌ ఆరంభంలోనే ఓపెనర్‌ మన్‌దీప్‌ సింగ్‌ (0)ను డకౌట్‌ చేశాడు. మరో సీమర్‌ సీన్‌ అబాట్‌ ఏకంగా స్టార్‌ ఆల్‌రౌండర్‌ మిచెల్‌ మార్ష్‌ (10)ను సాగనంపాడు. ఆరంభంలోనే రెండు వికెట్లు కోల్పోయిన ఢిల్లీ క్యాపిటల్స్‌ను డెవిడ్‌ వార్నర్‌ (92 నాటౌట్‌) ముందుకు నడిపించాడు. ఐపీఎల్‌లో తను నడిపించిన సన్‌రైజర్స్‌ హైదరాబాద్‌పైనే తిరుగులేని ఇన్నింగ్స్‌తో అదరగొట్టాడు. ఓ వైపు వికెట్లు పడుతున్నా డెవిడ్‌ వార్నర్‌ జోరు తగ్గలేదు. పవర్‌ ప్లే ముగిసే సరికి ఢిల్లీ క్యాపిటల్స్‌ 50 పరుగుల మైలురాయి దాటేసింది. కెప్టెన్‌ రిషబ్‌ పంత్‌ (26) ఆరంభంలో బంతిని బాదేందుకు బాగా ఇబ్బంది పడ్డాడు. 11 బంతుల్లో 4 పరుగులే చేశాడు. శ్రేయాస్‌ గోపాల్‌ వేసిన ఓవర్లో చెలరేగిన పంత్‌.. అదే ఓవర్లో వికెట్‌ సైతం కోల్పోయాడు. హ్యాట్రిక్‌ సిక్సర్లు సహా ఓ ఫోర్‌ బాదిన రిషబ్‌ పంత్‌ అదే ఓవర్లో చివరి బంతికి క్లీన్‌బౌల్డ్‌గా నిష్క్రమించాడు. దీంతో 85 పరుగుల వద్ద ఢిల్లీ క్యాపిటల్స్‌ మూడో వికెట్‌ కోల్పోయింది. రెండు సిక్సర్లు, ఏడు ఫోర్లతో 34 బంతుల్లోనే అర్థ సెంచరీ పూర్తి చేసిన డెవిడ్‌ వార్నర్‌.. పాత జట్టుపై ప్రతీకార ఇన్నింగ్స్‌ నమోదు చేశాడు.
పావెల్‌ ప్రతాపం : 11 ఓవర్లలో 100 పరుగులతో భారీ స్కోరు దిశగా సాగిన ఢిల్లీ క్యాపిటల్స్‌ ఇన్నింగ్స్‌కు డెవిడ్‌ వార్నర్‌ వెన్నెముకగా నిలువగా.. రోవ్‌మాన్‌ పావెల్‌ (67 నాటౌట్‌) ధనాధన్‌ రూపం అందించాడు. ఆరంభంలో నెమ్మదిగా ఆడిన పావెల్‌ చివర్లో చిచ్చరపడుగులా విశ్వరూపం చూపించాడు. ఆరు సిక్సర్లతో దండెత్తిన పావెల్‌ 30 బంతుల్లోనే అర్థ సెంచరీ పూర్తి చేశాడు. ఉమ్రాన్‌ మాలిక్‌ వేసిన ఇన్నింగ్స్‌ చివరి ఓవర్లో బౌండరీలపై దండయాత్ర చేసిన పావెల్‌ ఢిల్లీ క్యాపిటల్స్‌కు భారీ స్కోరు అందించాడు. 12 ఫోర్లు, మూడు సిక్సర్లతో అజేయంగా 92 పరుగులు చేసిన డెవిడ్‌ వార్నర్‌ చివరి ఓవర్లో నాన్‌ స్ట్రయిక్‌ ఎండ్‌లో ఉండిపోయాడు. సెంచరీ కోసం స్ట్రయిక్‌ ఇస్తానని పావెల్‌ కోరినా.. డెవిడ్‌ వార్నర్‌ నిరాకరించి క్రీడా స్ఫూర్తిని చాటుకున్నాడు. ఆరంభం నుంచీ ముగింపు వరకు ఇన్నింగ్స్‌లో ఎక్కడా జోరు తగ్గని డెవిడ్‌ వార్నర్‌ సన్‌రైజర్స్‌ హైదరాబాద్‌పై తృటిలో శతకం చేయలేకపోయాడు. 20 ఓవర్లలో 3 వికెట్లు కోల్పోయిన ఢిల్లీ క్యాపిటల్స్‌ 207 పరుగుల భారీ స్కోరు చేసింది. సన్‌రైజర్స్‌ హైదరాబాద్‌ బౌలర్లలో భువనేశ్వర్‌ కుమార్‌, సీన్‌ అబాట్‌, శ్రేయాస్‌ గోపాల్‌లు తలా ఓ వికెట్‌ ఖాతాలో వేసుకున్నారు.
స్కోరు వివరాలు :
ఢిల్లీ క్యాపిటల్స్‌ ఇన్నింగ్స్‌ : మన్‌దీప్‌ సింగ్‌ (సి) నికోలస్‌ పూరన్‌ (బి) భువనేశ్వర్‌ కుమార్‌ 0, డెవిడ్‌ వార్నర్‌ నాటౌట్‌ 92, మిచెల్‌ మార్ష్‌ (సి,బి) సీన్‌ అబాట్‌ 10, రిషబ్‌ పంత్‌ (బి) శ్రేయాస్‌ గోపాల్‌ 26, రోవ్‌మాన్‌ పావెల్‌ నాటౌట్‌ 67, ఎక్స్‌ట్రాలు : 12, మొత్తం :(20 ఓవర్లలో 3 వికెట్లకు) 207.
వికెట్ల పతనం : 1-0, 2-37, 3-85.
బౌలింగ్‌ : భువనేశ్వర్‌ కుమార్‌ 4-1-25-1, సీన్‌ అబాట్‌ 4-0-47-1, ఉమ్రాన్‌ మాలిక్‌ 4-0-52-0, కార్తీక్‌ త్యాగి 4-0-37-0, శ్రేయాస్‌ గోపాల్‌ 3-0-34-1, ఎడెన్‌ మార్కరం 1-0-11-0.