- అక్టోబర్‌ 1 నుంచి బాధ్యతల స్వీకరణ
లండన్‌ : మార్లీబోన్‌ క్రికెట్‌ క్లబ్‌ (ఎంసీసీ) తదుపరి అధ్యక్షుడిగా ఓ ఇంగ్లీష్‌ నటుడు నామినేట్‌ అయ్యాడు. ఎంసీసీ చరిత్రలోనే వార్షిక ఉపన్యాసం చేసిన తొలి క్రికెటేతర వ్యక్తిగా నిలిచిన నటుడు, కమెడియన్‌, జర్నలిస్ట్‌ స్టిఫెన్‌ ఫ్రే ప్రతిష్టాత్మక క్రికెట్‌ క్లబ్‌ అధ్యక్షుడిగా బాధ్యతలు నిర్వర్తించనున్నాడు. ఈ మేరకు ఎంసీసీ వెబ్‌సైట్‌లో గురువారం పొందుపరిచారు. ప్రస్తుత అధ్యక్షుడు క్లారె కానర్‌ ఈ మేరకు లార్డ్స్‌లో జరిగిన ఎంసీసీ వార్షిక సర్వ సభ్య సమావేశంలో ప్రకటించారు. అక్టోబర్‌ 1, 2022 నుంచి స్టిఫెన్‌ ఫ్రే ఎంసీసీ అధ్యక్ష బాధ్యతలు స్వీకరించనున్నాడు. ' ఎంసీసీ తదుపరి అధ్యక్షుడిగా నామినేట్‌ కావటం పట్ల ఎంతో గర్వపడుతున్నాను. గొప్ప గౌరవంగా స్వీకరిస్తున్నాను. క్రికెట్‌ ఆటకు ఎంసీసీ సేవలు ప్రపంచవ్యాప్తంగా సుపరిచితం. ఎంసీసీలో పని చేసే అవకాశం లభించటం బహుమానంగా భావిస్తున్నాను' అని స్టిఫెన్‌ ఫ్రే తెలిపారు. ఎంసీసీతో స్టిఫెన్‌ ఫ్రే అనుబంధం చాలాకాలంగా కొనసాగుతోంది. ఎంసీసీలో నూతన నిబంధనలపై పలు వీడియో సిరీస్‌లను ప్రజెంటేషన్ల రూపంలో స్టిఫెన్‌ ఫ్రే వివరించారు. ఆ వీడియోలను ఎంసీసీ తన ఈ లెర్నింగ్‌ వేదికలో వాడుకుంది. ప్రపంచ క్రికెట్‌ నిబంధనలు, కాలానుగుణ మార్పులు చేర్పుల బాధ్యత ఎంసీసీ భుజాలపై ఉన్న సంగతి తెలిసిందే. ఎంసీసీలో క్రికెట్‌ నిబంధనల మార్పుల అనంతరమే ఐసీసీ క్రికెట్‌ కమిటీ వాటిని పరిశీలించి ఆమోద ముద్ర వేస్తుంది.