సన్‌రైజర్స్‌ హైదరాబాద్‌ తడబాటు కొనసాగుతోంది. వరుసగా ఐదు విజయాల అనంతరం లయ కోల్పోయిన సన్‌రైజర్స్‌ వరుసగా నాల్గో పరాజయం చవిచూసింది. గత మ్యాచ్‌లో బెంగళూర్‌ను చిత్తుగా ఓడించిన హైదరాబాద్‌ తాజాగా ఆ జట్టు చేతిలో చిత్తు చిత్తుగా ఓటమిపాలైంది. 193 పరుగుల ఛేదనలో హైదరాబాద్‌ 125 పరుగులకే కుప్పకూలింది. హసరంగ (5/18) ఐదు వికెట్ల ప్రదర్శనతో మాయ చేయగా.. కెప్టెన్‌ డుప్లెసిస్‌ (73) ధనాధన్‌ అర్థ సెంచరీతో చెలరేగాడు. ఈ విజయంతో బెంగళూర్‌ ప్లే ఆఫ్స్‌ అవకాశాలు మరింత మెరుగయ్యాయి.
- 67 పరుగులతో బెంగళూర్‌ ఘన విజయం
- హసరంగకు ఐదు వికెట్లు, రాణించిన డుప్లెసిస్‌
- హైదరాబాద్‌ ప్లే ఆఫ్స్‌ ఆశలు సంక్లిష్టం
నవతెలంగాణ-ముంబయి
              రాయల్‌ చాలెంజర్స్‌ బెంగళూర్‌ ప్రతీకార విజయం సాధించింది. లీగ్‌ దశలో తొలి ముఖాముఖి పోరులో సన్‌రైజర్స్‌ చేతిలో దారుణంగా భంగపడిన డుప్లెసిస్‌ సేన.. తాజాగా ఆ జట్టుకు రిటర్న్‌ గిఫ్ట్‌ ఇచ్చింది!. 67 పరుగుల తేడాతో సన్‌రైజర్స్‌ హైదరాబాద్‌పై రాయల్‌ చాలెంజర్స్‌ బెంగళూర్‌ ఘన విజయం నమోదు చేసింది. 193 పరుగుల భారీ ఛేదనలో సన్‌రైజర్స్‌ హైదరాబాద్‌ 19.2 ఓవర్లలో 125 పరుగులకే కుప్పకూలింది. బెంగళూర్‌ లెగ్‌ స్పిన్నర్‌ వానిందు హసరంగ (5/18) ఐదు వికెట్ల ప్రదర్శనతో సన్‌రైజర్స్‌ పతనాన్ని శాసించాడు. రాహుల్‌ త్రిపాఠి (58, 37 బంతుల్లో 6 ఫోర్లు, 2 సిక్స్‌లు) మినహా మరో బ్యాటర్‌ ఆకట్టుకునే ప్రదర్శన చేయలేదు. కెప్టెన్‌ కేన్‌ విలియమ్సన్‌ (0), ఓపెనర్‌ అభిషేక్‌ శర్మ (0)లు దారుణంగా విఫలమయ్యారు. తొలుత బ్యాటింగ్‌ చేసిన రాయల్‌ చాలెంజర్స్‌ బెంగళూర్‌కు కెప్టెన్‌ ఫాఫ్‌ డుప్లెసిస్‌ (73, 50 బంతుల్లో 8 ఫోర్లు, 2 సిక్స్‌లు) అర్థ సెంచరీతో భారీ స్కోరు అందించాడు. విరాట్‌ కోహ్లి (0) నిరాశపరిచినా.. రజత్‌ పాటిదార్‌ (48, 38 బంతుల్లో 4 ఫోర్లు, 2 సిక్స్‌లు), చివర్లో దినేశ్‌ కార్తీక్‌ (30 నాటౌట్‌, 8 బంతుల్లో 1 ఫోర్‌, 4 సిక్స్‌లు) రాణించారు. ఐదు వికెట్లతో మెరిసిన వానిందు హసరంగ 'మ్యాన్‌ ఆఫ్‌ ది మ్యాచ్‌'గా నిలిచాడు. ఈ విజయంతో 12 మ్యాచుల్లో 14 పాయింట్లు సాధించిన బెంగళూర్‌ పాయింట్ల పట్టికలో టాప్‌-4లో కొనసాగుతోంది. 67 పరుగుల వ్యత్యాసంతో గెలుపొంది నెట్‌ రన్‌రేట్‌ను గణనీయంగా పెంచుకుంది. బెంగళూర్‌ చేతిలో ఓటమితో సన్‌రైజర్స్‌ హైదరాబాద్‌ సీజన్లో ఆరో ఓటమి చవిచూసింది. ప్లే ఆఫ్స్‌ అవకాశాలను మరింత సంక్లిష్టం చేసుకుంది!.
హసరంగ ఐదేశాడు : 193 పరుగుల ఛేదనలో సన్‌రైజర్స్‌ హైదరాబాద్‌ తేలిపోయింది. ఇన్నింగ్స్‌ తొలి ఓవర్లోనే ఓపెనర్లు ఇద్దరినీ కోల్పోయిన సన్‌రైజర్స్‌.. ఏ దశలోను కోలుకోలేదు. ఇన్నింగ్స్‌ తొలి బంతికే కేన్‌ విలియమ్సన్‌ (0) రనౌట్‌గా నిష్క్రమించగా..ఐదో బంతికి అభిషేక్‌ శర్మ (0) మాక్స్‌వెల్‌ మాయకు క్లీన్‌బౌల్డ్‌ అయ్యాడు. నం.3 బ్యాటర్‌ రాహుల్‌ త్రిపాఠి (58) అర్థ సెంచరీతో సన్‌రైజర్స్‌ను రేసులో నిలిపే ప్రయత్నం చేశాడు. ఎడెన్‌ మార్కరం (21, 27 బంతుల్లో 1 ఫోర్‌, 1 సిక్స్‌), నికోలస్‌ పూరన్‌ (19, 14 బంతుల్లో 2 ఫోర్లు, 1 సిక్స్‌)తో కలిసి కీలక భాగస్వామ్యాలు నమోదు చేశాడు. మరో ఎండ్‌లో ఈ ఇద్దరూ విఫలమయ్యారు. దీంతో మ్యాచ్‌ పూర్తిగా బెంగళూర్‌ చేతుల్లోకి వెళ్లిపోయింది. బెంగళూర్‌ లెగ్‌ స్పిన్నర్‌ వానిందు హసరంగ ఐదు వికెట్ల ప్రదర్శనతో అదరగొట్టాడు. మరో నాలుగు బంతులు ఉండగానే సన్‌రైజర్స్‌ హైదరాబాద్‌ కథ ముగిసింది. 67 పరుగుల తేడాతో బెంగళూర్‌ భారీ విజయం సొంతం చేసుకుంది. హర్షల్‌ పటేల్‌ (1/20), జోశ్‌ హజిల్‌వుడ్‌ (2/17), గ్లెన్‌ మాక్స్‌వెల్‌ (1/13)లు రాణించారు.
డుప్లెసిస్‌ దూకుడు : టాస్‌ నెగ్గి తొలుత బ్యాటింగ్‌ ఎంచుకున్న రాయల్‌ చాలెంజర్స్‌ బెంగళూర్‌కు ఆరంభంలోనే గట్టి షాక్‌ ఎదురైంది. స్టార్‌ బ్యాటర్‌, సూపర్‌స్టార్‌ విరాట్‌ కోహ్లి (0) ఇన్నింగ్స్‌ తొలి బంతికే వికెట్‌ కోల్పోయాడు. సుచిత్‌ బంతిని లెగ్‌సైడ్‌ ఆడబోయి షార్ట్‌ మిడ్‌వికెట్‌లో విలియమ్సన్‌ చేతికి చిక్కాడు. విరాట్‌ కోహ్లి వికెట్‌తో బెంగళూర్‌ నైరాశ్యంలోకి వెళ్లలేదు. సన్‌రైజర్స్‌కు ఏమాత్రం మానసికంగా పైచేయి ఇవ్వలేదు. కెప్టెన్‌ డుప్లెసిస్‌ (73, 50 బంతుల్లో 8 ఫోర్లు, 2 సిక్స్‌లు) జట్టును ముందుండి నడిపించాడు. యువ బ్యాటర్‌ రజత్‌ పాటిదార్‌ (48, 38 బంతుల్లో 4 ఫోర్లు, 2 సిక్స్‌లు)తో కలిసి రెండో వికెట్‌కు 105 పరుగుల శతక భాగస్వామ్యం నమోదు చేశాడు. పవర్‌ప్లేలో 47 పరుగులే చేసిన బెంగళూర్‌.. ఆ తర్వాత గేర్‌ మార్చింది. డుప్లెసిస్‌ బౌండరీల మోత మోగించాడు. ఆరు ఫోర్లు, రెండు సిక్సర్లతో 34 బంతుల్లోనే అర్థ సెంచరీ నమోదు చేశాడు. పాటిదార్‌ సైతం ఎక్కడా వెనక్కి తగ్గలేదు. ఈ ఇద్దరు నిష్క్రమంచినా.. గ్లెన్‌ మాక్స్‌వెల్‌ (33, 24 బంతుల్లో 3 ఫోర్లు, 2 సిక్స్‌లు), దినేశ్‌ కీర్తీక్‌ (30 నాటౌట్‌, 8 బంతుల్లో 1 ఫోర్‌, 4 సిక్స్‌లు) ధనాధన్‌ జోరు కొనసాగించారు. ముఖ్యంగా దినేశ్‌ కార్తీక్‌ సూపర్‌ ఫామ్‌ కొనసాగించాడు. ఎదుర్కొన్న 8 బంతుల్లోనే ఏకంగా నాలుగు సిక్సర్లు, ఓ ఫోర్‌తో 30 పరుగులు పిండుకున్నాడు. బెంగళూర్‌కు 192 పరుగుల భారీ స్కోరు అందించాడు. హైదరాబాద్‌ బౌలర్లలో జగదీశ సుచిత్‌ (2/30), కార్తీక్‌ త్యాగి (1/42) వికెట్లు ఖాతాలో వేసుకున్నారు.
స్కోరు వివరాలు :
రాయల్‌ చాలెంజర్స్‌ బెంగళూర్‌ ఇన్నింగ్స్‌ : విరాట్‌ కోహ్లి (సి) విలియమ్సన్‌ (బి) సుచిత్‌ 0, ఫాఫ్‌ డుప్లెసిస్‌ నాటౌట్‌ 73, రజత్‌ పాటిదార్‌ (సి) త్రిపాఠి (బి) సుచిత్‌ 48, గ్లెన్‌ మాక్స్‌వెల్‌ (సి) మార్కరం (బి) కార్తీక్‌ త్యాగి 33, దినేశ్‌ కార్తీక్‌ నాటౌట్‌ 30, ఎక్స్‌ట్రాలు : 8, మొత్తం : (20 ఓవర్లలో 3 వికెట్లకు) 192.
వికెట్ల పతనం : 1-0, 2-105, 3-159.
బౌలింగ్‌ : జగదీశ సుచిత్‌ 4-0-30-2, భువనేశ్వర్‌ కుమార్‌ 4-0-34-0, ఫారుఖ్‌ 4-0-47-0, కార్తీక్‌ త్యాగి 4-0-42-1, ఉఉమ్రాన్‌ మాలిక్‌ 2-0-25-1, అభిషేక్‌ శర్మ 2-0-13-0.
సన్‌రైజర్స్‌ హైదరాబాద్‌ ఇన్నింగ్స్‌ : అభిషేక్‌ శర్మ (బి) మాక్స్‌వెల్‌ 0, కేన్‌ విలియమ్సన్‌ (రనౌట్‌) 0, రాహుల్‌ త్రిపాఠి (సి) మహిపాల్‌ (బి) హజిల్‌వుడ్‌ 58, ఎడెన్‌ మార్కరం (సి) విరాట్‌ కోహ్లి (బి) డిసిల్వ 21, నికోలస్‌ పూరన్‌ (సి) షాబాజ్‌ అహ్మద్‌ (బి) డిసిల్వ 19, జగదీశ సుచిత్‌ (స్టంప్డ్‌) కార్తీక్‌ (బి) డిసిల్వ 2, శశాంక్‌ సింగ్‌ (సి) మాక్స్‌వెల్‌ (బి) డిసిల్వ 8, కార్తీక్‌ త్యాగి (సి) పాటిదార్‌ (బి) హజిల్‌వుడ్‌ 0, భువనేశ్వర్‌ కుమార్‌ (సి) డుప్లెసిస్‌ (బి) పటేల్‌ 8, ఉమ్రాన్‌ మాలిక్‌ (ఎల్బీ) డిసిల్వ 0, ఫారుక్‌ నాటౌట్‌ 2, ఎక్స్‌ట్రాలు :7, మొత్తం :(19.2 ఓవర్లలో ఆలౌట్‌) 125.
వికెట్ల పతనం : 1-0, 2-1, 3-51, 4-89, 5-104, 6-114, 7-114, 8-114, 9-114, 10-125.
బౌలింగ్‌ : గ్లెన్‌ మాక్స్‌వెల్‌ 2-0-13-1, జోశ్‌ హజిల్‌వుడ్‌ 4-0-17-2, షాబాజ్‌ నదీమ్‌ 2-0-20-0, మహ్మద్‌ సిరాజ్‌ 3-0-27-0, మహిపాల్‌ 1-0-7-0, హర్షల్‌ పటేల్‌ 3.2-0-20-1, వానిందు హసరంగ 4-1-18-5.