ఇండియన్‌ ప్రీమియర్‌ లీగ్‌ (ఐపీఎల్‌) 15వ సీజన్‌ తుది అంకానికి చేరుకుంది. లీగ్‌ దశ మ్యాచులు ఆదివారంతో ముగియగా.. మంగళవారం నుంచి నాకౌట్‌కు తెరలేవనుంది. పాయింట్ల పట్టికలో తొలి రెండు స్థానాల్లో నిలిచిన గుజరాత్‌ టైటాన్స్‌, రాజస్థాన్‌ రాయల్స్‌ ఫైనల్లో చోటు కోసం నేడు క్వాలిఫయర్‌1లో తలపడనున్నాయి. తొలి ఐపీఎల్‌లోనే గుజరాత్‌ టైటాన్స్‌ పాయింట్ల పట్టికలో అగ్రస్థానంలో నిలువగా.. తొలి ఐపీఎల్‌ అనంతరం తొలిసారి రాజస్థాన్‌ రాయల్స్‌ టాప్‌-2లో చోటు సాధించింది. తొలి ప్రయత్నంలోనే ఐపీఎల్‌ టైటిల్‌ను ఎత్తుకుపోవాలని గుజరాత్‌ సంకల్పించగా.. తొలి ఐపీఎల్‌ తర్వాత తొలిసారి ఐపీఎల్‌ ట్రోఫీని ముద్దాడాలనే ఉబలాటం రాజస్థాన్‌లో కనిపిస్తోంది. గుజరాత్‌ టైటాన్స్‌, రాజస్థాన్‌ రాయల్స్‌ క్వాలిఫయర్‌ 1 సమరం నేడు.
- ఫైనల్లో చోటు కోసం టైటాన్స్‌, రాయల్స్‌ ఢ
- గుజరాత్‌, రాజస్థాన్‌ క్వాలిఫయర్‌ పోరు నేడు
- రాత్రి 7.30 నుంచి స్టార్‌స్పోర్ట్స్‌లో ప్రసారం..
నవతెలంగాణ-కోల్‌కత
             ఐపీఎల్‌ 2022 అంచనాలకు భిన్నంగా సాగింది. పది జట్ల ఐపీఎల్‌పై అభిమానులతో పాటు క్రికెట్‌ పండితులకు సైతం సానుకూల అభిప్రాయం లేదు!. లోతైన దేశవాళీ క్రికెట్‌ ప్రతిభ పది జట్ల ఐపీఎల్‌ను సూపర్‌హిట్టు చేసింది. ఐపీఎల్‌లో తొలిసారి ఆడుతున్న గుజరాత్‌ టైటాన్స్‌, లక్నో సూపర్‌జెయింట్స్‌ ప్లే ఆఫ్స్‌కు చేరుకున్నాయి. తొలి సీజన్‌లో విజేతగా నిలిచిన రాజస్థాన్‌ రాయల్స్‌, తొలిసారి విజేతగా నిలవాలని తపిస్తోన్న రాయల్‌ చాలెంజర్స్‌ బెంగళూర్‌లు టాప్‌-4లో నిలిచాయి. ఈ సీజన్‌లో గుజరాత్‌ టైటాన్స్‌ తిరుగులేని ప్రదర్శనతో అగ్ర జట్టుగా నిలువగా.. మరోవైపు రాజస్థాన్‌ రాయల్స్‌ స్టార్స్‌ ప్రదర్శనతో టాప్‌-2లో నిలువగలిగింది. సమిష్టిగా ఆడుతూ సంచలన విజయాలు నమోదు చేస్తోన్న గుజరాత్‌ టైటాన్స్‌, కీలక ఆటగాళ్లనే నమ్ముకున్న రాజస్థాన్‌ రాయల్స్‌ నేడు క్వాలిఫయర్‌ 1 సమరానికి సిద్ధమయ్యాయి. క్వాలిఫయర్‌1లో నెగ్గిన జట్టు నేరుగా ఐపీఎల్‌ 2022 ఫైనల్లోకి ప్రవేశించనుంది. క్వాలిఫయర్‌1లో ఓడిన జట్టుకు క్వాలిఫయర్‌ 2 రూపంలో ఫైనల్స్‌కు చేరుకునేందుకు మరో అవకాశం దక్కనుంది. క్వాలిఫయర్‌ 1 సమరంలో నెగ్గి ఫైనల్లో తొలి అడుగు వేసేదెవరో? ఆసక్తికరం.
టైటాన్స్‌కు ఎదురుందా?! : గుజరాత్‌ టైటాన్స్‌ బ్యాటింగ్‌ లోతుపై తొలి నుంచీ అనుమానాలే. సమిష్టి ప్రదర్శనలతో టైటాన్స్‌ ఆ లోటు పూడ్చుకుంది. ఐపీఎల్‌ 2020లో టైటాన్స్‌ ఊహించని రికార్డు సాధించింది. ఛేదనలో తిరుగులేని జట్టుగా నిలిచింది. ఈ సీజన్లో ఆరుసార్లు ఛేదనకు బరిలోకి దిగిన టైటాన్స్‌ ప్రతిసారీ చివరి ఓవర్లో గెలుపొందింది. అయితే, లక్ష్యాలను నిర్దేశించటంలో గుజరాత్‌ టైటాన్స్‌ లోపం ప్రస్ఫుటం. గుజరాత్‌ టైటాన్స్‌ ఓడిన నాలుగు మ్యాచుల్లో ఏకంగా మూడింట లక్ష్యాలను కాపాడుకోవటంలో వచ్చినవే. ఆ మూడు మ్యాచుల్లోనూ గుజరాత్‌ టైటాన్స్‌ టాప్‌ ఆర్డర్‌ ప్రధాన కారణం. లీగ్‌ దశ చివర్లో ఆడిన ఐదు మ్యాచుల్లో గుజరాత్‌ ఏకంగా మూడింట పరాజయాలు చవిచూసింది. క్వాలిఫయర్‌1 ముంగిట టైటాన్స్‌ ఆత్మవిశ్వాసం కాస్త సడలేందుకు ఇద దోహదం చేయవచ్చు!. మహ్మద్‌ షమి రూపంలో పవర్‌ప్లేలో ప్రధాన పేసర్‌ వికెట్ల వేటలో ముందు నిలువగా.. డెత్‌ ఓవర్లలో రషీద్‌ ఖాన్‌ పరుగుల కట్టడిలో టైటాన్స్‌ను ముందుండి నడిపిస్తున్నాడు. బలమైన మిడిల్‌ ఆర్డర్‌ టైటాన్స్‌ బ్యాటింగ్‌ బలహీనతలను కప్పిపుచ్చుతోంది. ఇదే ఒరవడి మరో రెండు మ్యాచుల్లో కొనసాగించేందుకు టైటాన్స్‌ తయారైంది. హార్దిక్‌ పాండ్యకు నాయకత్వం బాగా కలిసొచ్చింది. కెప్టెన్సీ రాకతో పాండ్య ఆల్‌రౌండర్‌గా కదం తొక్కుతున్నాడు. ముంబయి ఇండియన్స్‌ తరఫున ఆడిన అనుభవం ఇక్కడ నాకౌట్‌ దశలో హార్దిక్‌ పాండ్యకు ఉపయుక్తం కానుంది. శుభ్‌మన్‌ గిల్‌, మాథ్యూ వేడ్‌, హార్దిక్‌ పాండ్య,డెవిడ్‌ మిల్లర్‌ సహా రాహుల్‌ తెవాటియలు టైటాన్స్‌కు బ్యాట్‌తో కీలకం కానున్నారు. లాకీ ఫెర్గుసన్‌, రషీద్‌ ఖాన్‌, మహ్మద్‌ షమిలు బంతితో టైటాన్స్‌ ఎక్స్‌ ఫ్యాక్టర్‌గా నిలువనున్నారు.
రాయల్స్‌ నిలిచేనా?! : రాజస్థాన్‌ రాయల్స్‌ ఎక్కువగా వ్యక్తిగత ప్రదర్శనలతోనే విజయవంతమైంది. జోశ్‌ బట్లర్‌ లీగ్‌ దశలోనే మూడు శతకాలు బాదాడు. లీగ్‌ దశ తొలి అర్థభాగంలో 81.83 సగటుతో రెచ్చిపోయిన బట్లర్‌.. ద్వితీయార్థంలో నెమ్మదించాడు. 19.71 సగటుతోనే పరుగులు సాధించాడు. ఈ సమయంలో రాయల్స్‌కు యువ బ్యాటర్‌ యశస్వి జైస్వాల్‌ అండ లభించింది. సంజు శాంసన్‌, దేవదత్‌ పడిక్కల్‌ ఆశించిన రీతిలో పరుగులు సాధించటంలో తేలిపోయారు. నేడు కీలక క్వాలిఫయర్‌లో బట్లర్‌, శాంసన్‌లు మెరిస్తే రాయల్స్‌కు ఎదురుండదు. బౌలింగ్‌ విభాగంలో రాయల్స్‌ ప్రధానంగా స్పిన్‌ జోడీపైనే ఆధారపడింది. యుజ్వెంద్ర చాహల్‌, రవిచంద్రన్‌ అశ్విన్‌లు సంయుక్తంగా 38 వికెట్లు ఖాతాలో వేసుకున్నారు. మిడిల్‌ ఓవర్లలో చాహల్‌, అశ్విన్‌లను ఎదుర్కొవటం ప్రత్యర్థులకు అంత సులువు కాదు. డెత్‌ ఓవర్లలో పరుగుల పొదుపుతో పాటు వికెట్ల వేటలోనూ చాహల్‌ తనదైన మార్క్‌ చూపిస్తున్నాడు. లక్ష్యాలను నిర్దేశించటంలో తిరుగులేని రాయల్స్‌.. ఛేదనలో తడబడుతోంది. రాయల్స్‌ బలహీతను సొమ్ముచేసుకునేందుకు టైటాన్స్‌కు లక్ష్యాలను నిర్దేశించటంలో బలహీనత అడ్డుగా వస్తోంది. సిక్సర్ల మోతలో జోశ్‌ బట్లర్‌, షిమ్రోన్‌ హెట్‌మయర్‌లు ముందున్నారు. అశ్విన్‌ బ్యాట్‌తోనూ నిలకడగా రాణించటం రాయల్స్‌కు అదనపు బలం.
పిచ్‌ రిపోర్టు : ఈడెన్‌ గార్డెన్స్‌ పిచ్‌ తాజాగా ఉంది. ఈ ఐపీఎల్‌లో ఈడెన్‌లో జరుగుతున్న తొలి మ్యాచ్‌ ఇదే. దీంతో క్వాలిఫయర్‌1లో పేస్‌ ప్రభావం గట్టిగానే ఉంటుంది. ఈడెన్‌గార్డెన్స్‌లో ఆడిన తొమ్మిది మ్యాచుల్లో రాజస్థాన్‌ రాయల్స్‌ రెండింట మాత్రమే గెలుపొందింది. గుజరాత్‌ టైటాన్స్‌ ఇక్కడ తొలి మ్యాచ్‌ ఆడబోతుంది. ఐపీఎల్‌లో ఇక్కడ ఛేదనకు అనుకూలత ఉంది. ఇక్కడ జరిగిన చివరి ఐదు ఐపీఎల్‌ మ్యాచుల్లో మూడింట రెండో ఇన్నింగ్స్‌లో బ్యాటింగ్‌ చేసిన జట్టును విజయం వరించింది. టాస్‌ నెగ్గిన జట్టు తొలుత బౌలింగ్‌ చేసేందుకు మొగ్గుచూపవచ్చు. లీగ్‌ దశలో గుజరాత్‌ టైటాన్స్‌, రాజస్థాన్‌ రాయల్స్‌ ఓసారి తలపడ్డాయి. ఆ మ్యాచ్‌లో గుజరాత్‌ 37 పరుగుల తేడాతో అలవోక విజయం నమోదు చేసింది.
వర్షం ముప్పు! : వాతావరణం చల్లబడింది. ఈడెన్‌గార్డెన్స్‌లో ఉష్ణోగ్రతలు గణనీయంగా తగ్గుముఖం పట్టాయి!. రానున్న రోజుల్లో ఇక్కడ వర్షం, బలమైన గాలులు వీచేందుకు ఆస్కారం ఉంది. ఈ మేరకు వాతావరణం శాఖ పేర్కొంది. మ్యాచ్‌ ఆరంభానికి వర్షం ప్రభావం చూపించవచ్చు. వర్షం ప్రభావంతో ఆట సాధ్యపడకపోతే.. సూపర్‌ ఓవర్‌ ద్వారా విజేతను తేల్చనున్నారు. సూపర్‌ ఓవర్‌ సైతం వీలుపడకపోతే.. లీగ్‌ దశ అనంతరం పాయింట్ల పట్టికలో మెరుగైన స్థానంలో నిలిచిన జట్టు ముందంజ వేయనుంది.
తుది జట్లు (అంచనా) :
రాజస్థాన్‌ రాయల్స్‌ : యశస్వి జైస్వాల్‌, జోశ్‌ బట్లర్‌, సంజు శాంసన్‌ (కెప్టెన్‌, వికెట్‌ కీపర్‌), దేవదత్‌ పడిక్కల్‌, షిమ్రోన్‌ హెట్‌మయర్‌, రియాన్‌ పరాగ్‌, రవిచంద్రన్‌ అశ్విన్‌, ట్రెంట్‌ బౌల్ట్‌, ప్రసిద్‌ కృష్ణ, యుజ్వెంద్ర చాహల్‌, ఒబెడ్‌ మెక్‌కారు.
గుజరాత్‌ టైటాన్స్‌ : వృద్దిమాన్‌ సాహా (వికెట్‌ కీపర్‌), శుభ్‌మన్‌ గిల్‌, మాథ్యూ వేడ్‌/అల్జారీ జొసెఫ్‌, హార్దిక్‌ పాండ్య (కెప్టెన్‌), డెవిడ్‌ మిల్లర్‌, రాహుల్‌ తెవాటియ, రషీద్‌ ఖాన్‌, ఆర్‌. సాయికిశోర్‌, లాకీ ఫెర్గుసన్‌, యశ్‌ దయాల్‌, మహ్మద్‌ షమి.