- సెమీస్‌లో అనిష్‌ గిరిపై గెలుపు
- ఫైనల్లో డింగ్‌ లిరెన్‌తో ఢీ
చెన్నై: చెస్సబుల్‌ మాస్టర్స్‌ ఆన్‌లైన్‌ చెస్‌ టోర్నమెంట్‌ భారత యువ గ్రాండ్‌మాస్టర్‌, 16ఏండ్ల ఆర్‌ ప్రజ్ఞానంద జోరు కొనసాగుతోంది. బుధవారం జరిగిన సెమీస్‌ పోటీలో ప్రజ్ఞానంద 1.5-0.5పాయింట్ల తేడాతో టైబ్రేకర్‌లో 3వ ర్యాంకర్‌, నెదర్లాండ్స్‌కు చెందిన అనిష్‌ గిరిపై అద్భుత విజయం సాధించాడు. బెస్ట్‌ ఆఫ్‌ ఫోర్‌ ర్యాపిడ్‌ గేమ్స్‌ పూర్తయ్యేసరికి ఇరువురు 2-2పాయింట్లతో సమంగా నిలిచారు. ఫలితం కోసం జరిగిన బ్రిట్జ్‌ టైక్రర్‌లో ప్రజ్ఞానంద.. అనిష్‌ గిరిని ఓడించాడు. 16మంది గ్రాండ్‌మాస్టర్లు పోటీపడిన ప్రిమిలిమినరీ లీగ్‌ ముగిసేసరికి అనిష్‌ గిరి అగ్రస్థానంలో నిలిచాడు. మరో సెమీస్‌లో గత సీజన్‌ రన్నరప్‌, ప్రపంచ ఛాంపియన్‌, టాప్‌సీడ్‌ మాగస్‌ కార్ల్‌సన్‌(నార్వే) అనూహ్యంగా ఓటమిపాలయ్యాడు. రెండో సెమీస్‌లో కార్ల్‌సన్‌ 1.5-2.5పాయింట్ల తేడాతో ప్రపంచ నంబర్‌ 2 డింగ్‌ లిరెన్‌(చైనా) చేతిలో అనూహ్య ఓటమిపాలయ్యాడు. నాల్గోరౌండ్‌ చివరి 15నిమిషాల ర్యాపిడ్‌ గేమ్‌లో కార్ల్‌సన్‌ అనవసర తప్పిదాలు చేసి ఓటమిపాలయ్యాడు. ప్రజ్ఞానంద బుధవారం 11వ తరగతి పరీక్షలు హాజరై విజయాన్ని సొంతం చేసుకోవడం విశేషం. గురువారం ప్రజ్ఞానంద ప్రధాని నరేంద్ర మోడీని కలవనున్నారు. ఫైనల్లో 16ఏళ్ల ప్రజ్ఞానంద.. 2వ ర్యాంకర్‌ డింగ్‌ లిరెన్‌తో తలపడనున్నాడు.
