- ఫైనల్స్‌కు చేరువగా హాకీ ఇండియా!
- ఆసియా కప్‌ హాకీ 2022
జకార్తా: హాకీ ఆసియా కప్‌లో టీమ్‌ ఇండియా ఫైనల్‌కు చేరువైంది. సూపర్‌-4 దశ తొలి పోరులో జపాన్‌ను మట్టికరిపించిన బారత జట్టు ఆదివారం మలేషియాతో జరిగిన రెండో మ్యాచ్‌ను 3-3తో 'డ్రా' చేసుకుంది. భారత్‌ తరఫున విష్ణుకాంత్‌ సింగ్‌ (32వ నిమిషం), సునీల్‌ (53వ నిమిషం), నీలమ్‌ (55వ నిమిషం) గోల్స్‌ నమోదు చేశారు. మలేషియా తరఫున రహీమ్‌ (12వ, 21వ, 56వ నిమిషాల్లో) హ్యాట్రిక్‌ గోల్స్‌తో చెలరేగాడు. ప్రస్తుతం సూపర్‌-4లో దశలో దక్షిణ కొరియా తర్వాత భారత్‌ రెండో స్థానంలో కొనసాగుతున్నది. తొలి క్వార్టర్‌ నుంచే భారత గోల్‌ పోస్ట్‌పై దండెత్తిన మలేషియా 12వ నిమిషంలో శుభారంభం చేసింది. రెండో క్వార్టర్‌లో మరో గోల్‌ కొట్టడంతో అర్ధభాగానికి మలేషియా 2-0తో ఆధిక్యంలో నిలిచింది. మూడో క్వార్టర్‌లో ఓ గోల్‌ చేసి ఆధిక్యాన్ని కాస్త తగ్గించిన భారత్‌.. ఆఖరి క్వార్టర్‌లో రెండు నిమిషాల వ్యవధిలో రెండు గోల్స్‌ చేసి ఆధిక్యంలోకి దూసుకెళ్లింది. ఇక మ్యాచ్‌ భారత్‌ వశమైనట్లే అనుకుంటున్న దశలో మలేషియా ఆటగాడు రహీమ్‌ హ్యాట్రిక్‌ గోల్‌తో మ్యాచ్‌ను 'డ్రా'గా ముగించాడు. ఆఖరి పోరులో మంగళవారం దక్షిణా కొరియాతో తలపడనున్న టీమ్‌ఇండియా.. ఆ మ్యాచ్‌ను 'డ్రా' చేసుకున్నా ఫైనల్‌కు అర్హత సాధిస్తుంది.