- దక్షిణాఫ్రికాతో టీ20 సిరీస్‌
న్యూఢిల్లీ : స్వదేశంలో దక్షిణాఫ్రికాతో టీ20 సిరీస్‌కు టీమ్‌ ఇండియా కాస్త ఆలస్యంగా సన్నద్ధత ఆరంభించ నుంది!. జూన్‌ 9న న్యూఢిల్లీలో తొలి టీ20 జరుగనుండగా.. కెఎల్‌ రాహుల్‌ సారథ్యంలోని టీమ్‌ ఇండియా జూన్‌ 5న న్యూఢిల్లీకి చేరనుంది. ఈ మేరకు డీడీసీఏ కార్యదర్శి రాజన్‌ మన్‌చంద్ర తెలిపారు. రెండు నెలల ఐపీఎల్‌ అనంతరం భారత ఆటగాళ్లు విశ్రాంతి తీసుకుంటున్నారు. కెప్టెన్‌ రోహిత్‌ శర్మ, విరాట్‌ కోహ్లి, జశ్‌ప్రీత్‌ బుమ్రాలకు విశ్రాంతి లభించగా.. సఫారీలతో పొట్టి సవాల్‌కు రాహుల్‌ నాయత్వం వహించనున్నాడు. మరోవైపు దక్షిణాఫ్రికా జట్టు గురువారం (జూన్‌ 2) న్యూఢిల్లీకి చేరుకోనుంది. భారత్‌, దక్షిణాఫ్రికా ఐదు టీ20ల సిరీస్‌కు ఎటువంటి ఆంక్షలు లేవు. ఆటగాళ్లకు కోవిడ్‌-19 పరీక్షలు రెగ్యులర్‌గా నిర్వహిస్తూనే.. కోవిడ్‌కు పూర్వ వాతావరణంలోనే సిరీస్‌ జరుగనుంది.