ముగిసిన రాష్ట్ర స్థాయి పవర్‌లిఫ్టింగ్‌ పోటీలు
హైదరాబాద్ : తెలంగాణ రాష్ట్ర స్థాయి పవర్‌లిఫ్టింగ్‌ చాంపియన్‌షిప్స్‌లో (సబ్‌ జూనియర్‌, జూనియర్‌) రంగారెడ్డి జిల్లా ఓవర్‌లాల్‌ చాంపియన్‌గా నిలిచింది. సీనియర్‌ పవర్‌లిఫ్టర్‌ ప్రకాశ్‌ జ్ఞాపకార్థం రెండు రోజుల పాటు రాష్ట్ర స్థాయి పోటీలు నిర్వహించగా.. బాలుర విభాగంలో రంగారెడ్డి జిల్లా అగ్రస్థానంలో నిలిచింది. జూనియర్‌, సబ్‌ జూనియర్‌ విభాగాల్లో కలిపి రంగారెడ్డి జిల్లాకు ఆరు స్వర్ణాలు, ఏడు రజతాలు, మూడు కాంస్య పతకాలు వచ్చాయి. మహిళల విభాగంలో రెండు పసిడి పతకాలు, మూడు రజతాలు, ఓ కాంస్య పతకం సాధించారు. హైదరాబాద్ జిల్లా ద్వితీయ స్థానంలో, ఖమ్మం జిల్లా తృతీయ స్థానాల్లో నిలిచాయి. తెలంగాణ పవర్‌లిఫ్టింగ్‌ అసోసియేషన్‌ వర్కింగ్‌ ప్రెసిడెంట్‌ రమేశ్‌ గౌడ్‌ విజేతలకు బహుమతులు అందజేశారు. ముగింపు కార్యక్రమంలో రంగారెడ్డి జిల్లా పవర్‌లిఫ్టింగ్‌ అధ్యక్ష కార్యదర్శులు అనిల్‌ కుమార్‌, గోపాల్‌ కృష్ణ, కోచ్‌ ఆనంద్‌ రాజ్‌లు పాల్గొన్నారు.
