- టీమ్‌ఇండియాను ఓడించటం అంత ఈజీకాదు..
పాక్‌ మాజీ కెప్టెన్‌ ఇంజమామ్‌ ఉల్‌ హక్‌
న్యూఢిల్లీ : దక్షిణాఫ్రికాతో జరుగుతున్న ఐదు టీ20 మ్యాచ్‌ల సిరీస్‌లో తొలి రెండు మ్యాచ్‌ల్లో ఓటమిపాలై డీలాపడ్డ టీమ్‌ఇండియా మూడో టీ20లో పుంజుకున్న విషయం తెలిసిందే. తొలుత భారత జట్టు 5 వికెట్ల నష్టానికి 179 పరుగులు చేసింది. భారత బౌలర్లు హర్షల్‌ పటేల్‌ 4, యుజువేంద్ర చాహల్‌ 3 వికెట్లతో విజృంభించడంతో సౌతాఫ్రికా 19.1 ఓవర్లలో 131 పరుగులకే కుప్పకూలింది. దీంతో టీమ్‌ఇండియా 48 పరుగుల తేడాతో ఘన విజయం సాధించి సిరీస్‌ ఆశలను నిలుపుకుంది. ఈ నేపథ్యంలో భారత జట్టుపై పాకిస్థాన్‌ మాజీ కెప్టెన్‌ ఇంజమామ్‌ ఉల్‌ హక్‌ ప్రశంసల వర్షం కురిపించాడు. సీనియర్‌ ఆటగాళ్లు లేకున్నా ద్వితీయ శ్రేణి జట్టు అద్భుతంగా పోరాడుతున్నదన్నాడు. టీమ్‌ఇండియా డ్రెస్సింగ్‌ రూమ్‌లో రాహుల్‌ ద్రావిడ్‌ ఉన్నాడనీ, స్వదేశంలో భారత జట్టు అంత తేలికగా ఓడిపోదని ఇంజమామ్‌ తెలిపాడు.