జిల్లాకు ఘన స్వాగతం -విజయోత్సవ ర్యాలీ
- ప్రోత్సాహకాలు అందించిన మంత్రి, అర్బన్‌ ఎమ్మెల్యే
- బోధన్‌లో నివాసస్థలం కేటాయిస్తా : బోధన్‌ ఎమ్మెల్యే
నవతెలంగాణ-నిజామాబాద్ సిటీ
ప్రపంచ బాక్సింగ్‌ ఛాంపియన్‌షిప్‌ సాధించి నిజామాబాద్ నగరానికి గురువారం తొలిసారిగా అడుగుపెట్టిన అంతర్జాతీయ బాక్సర్‌ నిఖత్‌ జరీన్‌కు జిల్లా కేంద్రంలో జనం అడుగడుగునా నీరాజనాలు పలికారు. జిల్లా యంత్రాంగం ఆధ్వర్యంలో ఆమెను ఘనంగా సన్మానించారు. ముందుగా ఫులాంగ్‌ చౌరస్తా నుంచి కలెక్టరేట్‌ మీదుగా ఖలీల్‌ వాడిలోని న్యూఅంబేద్కర్‌ భవన్‌ వరకు విజయోత్సవ ర్యాలీ నిర్వహించారు. నిఖత్‌ జరీన్‌ టాప్‌లెస్‌ జీపులో ప్రధాన మార్గం గుండా తాను సాధించిన ప్రపంచ ఛాంపియన్‌ షిప్‌ పతాకాన్ని ప్రదర్శిస్తూ ముందుకు సాగారు. ర్యాలీలో వివిధ క్రీడా, ఉద్యోగ సంఘాల ప్రతినిధులు, యువతీ యువకులు, విద్యార్థులు, క్రీడాభిమానులు మువ్వన్నెల జెండాలు చేతబూని బైక్‌లపై నినాదాలు చేస్తూ ర్యాలీని అనుసరించారు.
న్యూ అంబేద్కర్‌ భవన్‌ వద్ద మంత్రి వేముల ప్రశాంత్‌ రెడ్డి, జెడ్పీ చైర్మన్‌ దాదన్నగారి విఠల్‌రావు, ఎమ్మెల్యేలు బిగాల గణేష్‌ గుప్తా, షకీల్‌ ఆమేర్‌, కలెక్టర్‌ సి.నారాయణరెడ్డి, పోలీస్‌ కమిషనర్‌ కేఆర్‌.నాగరాజు, నగర మేయర్‌ నీతూ కిరణ్‌ తదితరులు నిఖత్‌ జరీన్‌కు ఘన స్వాగతం పలికారు. జిల్లా యంత్రాంగం ఆధ్వర్యంలో ఆమెను ఘనంగా సన్మానించారు. మంత్రి ప్రశాంత్‌రెడ్డి నిఖత్‌కు రూ.1లక్ష నగదు, ఆమె కోచ్‌ సంసాముద్దీన్‌కు రూ.50వేల నగదు ప్రోత్సాహకాన్ని అందించారు. అర్బన్‌ ఎమ్మెల్యే బిగాల కూడా నిఖత్‌కు లక్ష రూపాయల నగదు పారితోషికాన్ని అందించారు. ఎమ్మెల్యే షకీల్‌ తాను ప్రాతినిధ్యం వహిస్తున్న బోధన్‌ నియోజకవర్గంలో నిఖత్‌కు సన్మాన కార్యక్రమం ఏర్పాటు చేసి నివాసస్థలం కేటాయిస్తానని ప్రకటించారు. నిజామాబాద్ ముద్దుబిడ్డ నిఖత్‌ జరీన్‌ మున్ముందు మరిన్ని అద్వితీయ విజయాలను సాధించాలని, దిగ్గజ బాక్సర్‌ మేరీకోమ్‌ రికార్డ్‌ను అధిగమించాలని మంత్రి ప్రశాంత్‌రెడ్డి ఆశాభావం వ్యక్తం చేశారు. నిఖత్‌ విజయంతో ప్రతి తెలంగాణ బిడ్డ గర్వపడాలని, పట్టుదల, కృషికి ఆమె నిదర్శనమని కలెక్టర్‌ నారాయణరెడ్డి అన్నారు. అదృష్టాన్ని కాకుండా కష్టాన్ని నమ్ముకుంటే ప్రపంచ స్థాయిలోనూ విజయ పతాకాన్ని రెపరెపలాడించవచ్చని నిఖత్‌ నిరూపించిందని పోలీస్‌ కమిషనర్‌ నాగరాజు తెలిపారు. ప్రపంచ ఛాంపియన్‌షిప్‌ సాధించి నిజామాబాద్‌కు వచ్చిన తనకు పెద్ద ఎత్తున స్వాగతం పలకడం పట్ల చాలా ఆనందంగా ఉందని నిఖత్‌ జరీన్‌ తన సంతోషాన్ని వ్యక్తపర్చింది. కార్యక్రమంలో జిల్లా ఒలింపిక్‌ సంఘం అధ్యక్షులు గడీల రాములు, మార్క్‌ఫెడ్‌ చైర్మెన్‌ మార గంగారెడ్డి, నుడా చైర్మెన్‌ ప్రభాకర్‌ రెడ్డి, టీఎన్‌జీఓ సంఘం అధ్యక్ష, కార్యదర్శులు కిషన్‌, అమృత్‌ కుమార్‌, రెవెన్యూ అసోసియేషన్‌ అధ్యక్షులు రమణ్‌, డీఎస్‌డీఓ ముత్తెన్న, నిఖత్‌ జరీన్‌ తల్లిదండ్రులు పర్వీన్‌ సుల్తానా, జమీల్‌ అహ్మద్‌ తదితరులు పాల్గొన్నారు.
