- శ్రీలంకపై భారత్‌ విజయం
- 5 వికెట్ల తేడాతో హర్మన్‌సేన జోరు
దంబుల్లా (శ్రీలంక) : వరుస అపజయాలు, సిరీస్‌ వైఫల్యాల అనంతరం టీమ్‌ ఇండియా ఓ మంచి విజయం ఖాతాలో వేసుకుంది. శ్రీలంకపై టీ20 సిరీస్‌ను మరో మ్యాచ్‌ ఉండగానే సొంతం చేసుకుంది. కెప్టెన్‌ హర్మన్‌ప్రీత్‌ కౌర్‌ ఆల్‌రౌండ్‌ ప్రదర్శనతో టీమ్‌ ఇండియాకు సాధికారిక విజయం అందించింది. 126 పరుగుల లక్ష్యాన్ని భారత్‌ 19.1 ఓవర్లలో ఛేదించింది. హర్మన్‌ప్రీత్‌ కౌర్‌ (31 నాటౌట్‌, 32 బంతుల్లో 2 ఫోర్లు) ప్లేయర్‌ ఆఫ్‌ ది మ్యాచ్‌గా నిలిచింది. సిరీస్‌లో చివరి మ్యాచ్‌ దంబుల్లాలోనే సోమవారం జరుగనుంది. తొలుత బ్యాటింగ్‌ చేసిన శ్రీలంక అమ్మాయిలు 20 ఓవర్లలో 7 వికెట్లకు 125 పరుగులే చేశారు. ఓపెనర్లు విష్మి గుణరత్నె (45, 50 బంతుల్లో 6 ఫోర్లు), చమరి ఆటపట్టు (43, 41 బంతుల్లో 7 ఫోర్లు, 1 సిక్స్‌) తొలి వికెట్‌కు 87 పరుగుల భారీ భాగస్వామ్యం నమోదు చేశారు. దీంతో శ్రీలంక భారీ స్కోరు దిశగా సాగింది. భారత బౌలర్లు పుంజుకోవటంతో మిడిల్‌ ఆర్డర్‌ చేతులెత్తేసింది. హర్షిత (9), కవిశ దిల్హరి (2), నీలాక్షి డిసిల్వ (1), హాసిని పెరీరా (0), రణసింగె (5)లు తేలిపోయారు. దీంతో శ్రీలంక స్వల్ప స్కోరుకు పరిమితం కావాల్సి వచ్చింది. భారత బౌలర్లలో దీప్తి శర్మ (2/34) రాణించింది. రేణుక సింగ్‌, రాధ యాదవ్‌, పూజ, హర్మన్‌ప్రీత్‌ కౌర్‌లు ఒక్కో వికెట్‌ పడగొట్టారు.
సమిష్టిగా కొట్టారు : 126 పరుగుల లక్ష్య ఛేదనలో భారత అమ్మాయిలు కలిసికట్టుగా రాణించారు. స్మృతీ మంధాన (39, 34 బంతుల్లో 8 ఫోర్లు) నిలకడగా రాణించగా.. షెఫాలీ వర్మ (17 10 బంతుల్లో 2 ఫోర్లు, 1 సిక్స్‌), సబ్బినేని మేఘన (17, 10 బంతుల్లో 4 ఫోర్లు) ధనాధన్‌ జోరు చూపించారు. టాప్‌ ఆర్డర్‌లో షెఫాలీ, మేఘన జోరుతో భారత్‌ లక్ష్యం దిశగా దూసుకెళ్లింది. కానీ జెమీమా రొడ్రిగస్‌ (3), యస్టికా భాటియా (13) వికెట్లతో మ్యాచ్‌ రక్తి కట్టింది. పది ఓవర్ల అనంతరం కట్టుదిట్టంగా బౌలింగ్‌ చేసిన శ్రీలంక.. బౌండరీలు నిరాకరించింది. వికెట్ల మధ్య పరుగుతోనే భారత స్కోరు బోర్డు ముందుకు కదిలింది. దీప్తి శర్మ (5 నాటౌట్‌) తోడుగా కెప్టెన్‌ హర్మన్‌ప్రీత్‌ కౌర్‌ (31 నాటౌట్‌) అజేయ ఇన్నింగ్స్‌తో భారత్‌ను గెలుపు తీరాలకు చేర్చింది. చివరి ఓవర్‌ తొలి బంతిని బౌండరీగా బాదిన హర్మన్‌ప్రీత్‌ మరో ఐదు బంతులు ఉండగానే లాంఛనం ముగించింది. 2-0తో సిరీస్‌ సొంతం చేసుకున్న టీమ్‌ ఇండియా.. క్లీన్‌స్వీప్‌ విజయం కోసం సోమవారం బరిలోకి దిగనుంది.
స్కోరు వివరాలు :
శ్రీలంక మహిళల ఇన్నింగ్స్‌ : 125/7 (విష్మి గుణరత్నె 45, చామరి ఆటపట్టు 43, దీప్తి శర్మ 2/34)
భారత మహిళల ఇన్నింగ్స్‌ : 127/5 (స్మృతీ మంధాన 39, హర్మన్‌ప్రీత్‌ కౌర్‌ 31, ఇనోక రణవీర 2/18)
