- కొత్త తేదీలను వెల్లడించిన చైనా
హాంగ్జూ(చైనా): 19వ ఆసియా క్రీడల కొత్త తేదీలను ఒలింపిక్‌ కౌన్సిల్‌ ఆఫ్‌ ఆసియా(ఓసిఏ) మంగళవారం విడుదల చేసింది. షెడ్యూల్‌ ప్రకారం ఈ ఏడాది సెప్టెంబర్‌ 10-25మధ్య హాంగ్జూ వేదికగా 19వ ఆసియా క్రీడలు జరగాల్సి ఉంది. కోవిడ్‌-19 దృష్ట్యా ఈ క్రీడలను వచ్చే ఏడాది 2023 సెప్టెంబర్‌ 8నుంచి అక్టోబర్‌ వరకు నిర్వహించనున్నట్లు ప్రకటించింది. మే 6, 2022న జరిగిన ఓసిఏ ఎగ్జిక్యూటివ్‌ బోర్డు సమావేశంలో 2022 సెప్టెంబర్‌లోనే ఆసియా క్రీడల నిర్వహణకు ఆమోదం లభించింది. కానీ చైనాలో ప్రస్తుతం ఆసియా క్రీడలు జరిగే పరిస్థితి లేనందున కొత్త తేదీల ఖరారు చేశారు. తాజాగా రెండు నెలల్లో జరిగిన సమావేశాల్లో చైనీస్‌ ఒలింపిక్‌ కమిటీ, ఆసియా క్రీడల ఆర్గనైజింగ్‌ కమిటీ 2023లోనే క్రీడలు నిర్వహణకు మొగ్గు చూపడంతో తప్పనిపరిస్థితుల్లో వాయిదా వేస్తున్న ఓసిఏ మంగళవారం ఓ ప్రకటనలో తెలిపింది.