- హౌప్‌, పూరన్‌ అర్థ శతకాలు
- భారత్‌, విండీస్‌ రెండో వన్డే
పోర్ట్‌ ఆఫ్‌ స్పెయిన్‌ : షారు హౌప్‌, నికోలస్‌ పూరన్‌ అర్థ సెంచరీలతో చెలరేగటంతో రెండో వన్డేలో వెస్టిండీస్‌ భారీ స్కోరు దిశగా సాగుతోంది. టాస్‌ నెగ్గిన వెస్టిండీస్‌ తొలుత బ్యాటింగ్‌ ఎంచుకుంది. తొలి వన్డేలో ఛేదనకు వెళ్లి విఫలమైన పూరన్‌.. రెండో వన్డేలో మనసు మార్చుకున్నాడు. ఓపెనర్లు షారు హౌప్‌, కైల్‌ మేయర్స్‌ శుభారంభం అందించారు. భారత పేసర్లను సమర్థవంతంగా ఎదుర్కొన్న ఈ జోడీ తొలి వికెట్‌కు వేగంగా 65 పరుగులు జోడించింది. మేయర్స్‌ ఆరు ఫోర్లు, ఓ సిక్సర్‌తో మెరువగా.. హౌప్‌ సైతం మరో ఎండ్‌లో రెచ్చిపోయాడు. క్రీజులో కుదురుకున్న కైల్‌ మేయర్స్‌ (39, 23 బంతుల్లో 6 ఫోర్లు, 1 సిక్స్‌) దీపక్‌ హుడా మాయలో పడేశాడు. హౌప్‌తో కలిసి షమ్రా బ్రూక్స్‌ (35, 36 బంతుల్లో 5 ఫోర్లు) మరో 62 పరుగులు జోడించారు. ఈ ఇద్దరి భాగస్వామ్యంతో విండీస్‌ పటిష్ట స్థితిలో నిలిచింది. బ్రాండన్‌ కింగ్‌ (0)ను డకౌట్‌ చేసిన చాహల్‌ విండీస్‌ను వెనక్కి లాగాడు. కానీ కెప్టెన్‌ నికోలస్‌ పూరన్‌తో జట్టు కట్టిన షారు హౌప్‌ నాల్గో వికెట్‌కు భారీ భాగస్వామ్యం నిర్మించాడు. హౌప్‌ 69 బంతుల్లో అర్థ సెంచరీ నమోదు చేయగా.. పూరన్‌ 60 బంతుల్లో అర్థ సెంచరీ సాధించాడు. దీంతో 40 ఓవర్ల అనంతరం వెస్టిండీస్‌ 218/3తో భారీ స్కోరు దిశగా సాగుతోంది. హౌప్‌, నికోలస్‌ పూరన్‌ అజేయంగా ఆడుతున్నారు. భారత బౌలర్లలో స్పిన్నర్లు చాహల్‌, అక్షర్‌, దీపక్‌లు వికెట్లు పడగొట్టారు.