- కామన్‌వెల్త్‌ అథ్లెట్లతో ప్రధాని మోడీ
న్యూఢిల్లీ : భారత క్రీడా రంగంలో స్వర్ణ యుగం ఇప్పుడిప్పుడు తలుపు తడుతోందని ప్రధానమంత్రి నరెంద్ర మోడీ అన్నారు. 2022 బర్మింగ్‌హామ్‌ కామన్‌వెల్త్‌ క్రీడల్లో పతకాలు సాధించిన అథ్లెట్లకు ప్రధాని మోడీ తన నివాసంలో విందు ఇచ్చారు. ఈ సందర్భంగా అథ్లెట్లను ఉద్దేశించి మాట్లాడిన మోడీ.. కామన్‌వెల్త్‌ క్రీడల్లో భారత క్రీడాకారుల ప్రదర్శనను ప్రశంసించారు. మహిళల క్రికెట్‌ జట్టు, హాకీ జట్లు సహా లాన్‌బౌల్స్‌లో భారత జట్ల ప్రదర్శన పట్ల మోడీ హర్షం వ్యక్తం చేశారు. ఈ సందర్భంగా బాక్సింగ్‌, రెజ్లింగ్‌, టేబుల్‌ టెన్నిస్‌, బ్యాడ్మింటన్‌, వెయిట్‌లిఫ్టింగ్‌, ట్రాక్‌ అండ్‌ ఫీల్డ్‌ అథ్లెట్లతో మోడీ ప్రత్యేకంగా ముచ్చటించారు. కామన్‌వెల్త్‌ క్రీడల్లో పసిడి పతకం సాధించిన వరల్డ్‌ చాంపియన్‌, తెలంగాణ స్టార్‌ బాక్సర్‌ నిఖత్‌ జరీన్‌ ప్రధాని మోడీ బాక్సింగ్‌ గ్లౌవ్స్‌ను అందించింది. చెస్‌ ఒలింపియాడ్‌లో కాంస్య పతకాలు సాధించిన భారత గ్రాండ్‌మాస్టర్ల బృందాన్ని సైతం ప్రధాని మోడీ అభినందించారు. ఈ కార్యక్రమంలో క్రీడా శాఖ మంత్రి అనురాగ్‌ ఠాకూర్‌ తదితరులు పాల్గొన్నారు.
