- 3-0తో వన్డే సిరీస్‌ భారత్‌ వశం
- ఛేదనలో సికందర్‌ శతకం వృథా
- శతకబాదిన శుభ్‌మన్‌ గిల్‌
                క్లీన్‌స్వీప్‌. జింబాబ్వేపై వన్డే సిరీస్‌ను 3-0తో భారత్‌ సొంతం చేసుకుంది. తొలి రెండు మ్యాచుల్లో అలవోక విజయాలు సాధించిన టీమ్‌ ఇండియా.. నామమాత్రపు మ్యాచ్‌లో తృటిలో పరాజయాన్ని తప్పించుకుంది!. 290 పరుగుల ఛేదనలో సికందర్‌ రజా (115) శతకంతో పోరాడినా ఫలితం దక్కలేదు. 276 పరుగులకు జింబాబ్వేను కుప్పకూల్చిన భారత్‌ 13 పరుగుల తేడాతో మూడో వన్డేలో విజయం సాధించింది. శుభ్‌మన్‌ గిల్‌ (130) సెంచరీతో తొలుత భారత్‌ 289 పరుగులు చేసింది.
నవతెలంగాణ-హారారే
                శుభ్‌మన్‌ గిల్‌ (130, 97 బంతుల్లో 15 ఫోర్లు, 1 సిక్స్‌) శతక మోత మోగించాడు. భీకర ఫామ్‌ కొనసాగించిన యువ బ్యాటర్‌ టాప్‌ ఆర్డర్‌లో ధనాధన్‌ షో చూపించాడు. ఇషాన్‌ కిషన్‌ (50, 61 బంతుల్లో 6 ఫోర్లు) అర్థ సెంచరీతో తోడవటంతో భారత్‌ తొలుత 289 పరుగులు చేసింది. జింబాబ్వేపై 13 పరుగుల తేడాతో విజయం సాధించింది. 290 పరుగుల ఛేదనలో జింబాబ్వే చివరి వరకు పోరాడింది. స్టార్‌ బ్యాటర్‌ సికందర్‌ రజా (115, 95 బంతుల్లో 9 ఫోర్లు, 3 సిక్స్‌లు) శతకంతో ఆతిథ్య జట్టుకు అద్వితీయ విజయాన్ని అందించేలా కనిపించాడు. చివరి 12 బంతుల్లో 17 పరుగులు చేయాల్సిన దశలో మ్యాచ్‌ జింబాబ్వే వైపు మొగ్గింది. కానీ వరుస వికెట్లతో భారత బౌలర్లు మ్యాచ్‌ను మలుపు తిప్పారు. మూడు వన్డేల సిరీస్‌ను భారత్‌ 3-0తో క్లీన్‌స్వీప్‌ చేసింది. శుభ్‌మన్‌ గిల్‌ 'మ్యాన్‌ ఆఫ్‌ ది మ్యాచ్‌'తో పాటు మ్యాన్‌ ఆఫ్‌ ది సిరీస్‌ అవార్డును సైతం సొంతం చేసుకున్నాడు.
సికందర్‌ పోరాడినా..! : 290 పరుగుల ఛేదనలో జింబాబ్వే పోరాటం అసమానం!. స్టార్‌ బ్యాటర్‌ సికందర్‌ రజా (115) ఛేదనలో నిలిచాడు. టాప్‌ ఆర్డర్‌ 122/5తో మరోసారి నిరాశపరిచినా.. టెయిలెండర్లతో కలిసి గొప్ప పోరాటం చేశాడు. ఐదు వికెట్ల వీరుడు బ్రాడ్‌ ఎవాన్స్‌ (28, 36 బంతుల్లో 2 ఫోర్లు)తో కలిసి సికందర్‌ రజా ఏకంగా 104 పరుగుల భారీ భాగస్వామ్యం నెలకొల్పాడు. ఈ ఇద్దరి భాగస్వామ్యంతో ఓటమి లాంఛనం అనుకున్న జింబాబ్వే.. విజయంపై కన్నేసింది. చివరి 18 బంతుల్లో 33 పరుగులు చేయాల్సి ఉండగా.. అవేశ్‌ ఖాన్‌ 48వ ఓవర్లో 16 పరుగులు ఇచ్చాడు. దీంతో మ్యాచ్‌ జింబాబ్వే వైపు మొగ్గింది. ఆ ఓవరోల చివరి బంతికి ఎవాన్స్‌ను వెనక్కి పంపిన అవేశ్‌ ఖాన్‌.. జింబాబ్వేపై ఒత్తిడి పెంచాడు. శార్దుల్‌ ఠాకూర్‌ 49వ ఓవర్లో గిల్‌ మెరుపు క్యాచ్‌తో సికందర్‌ పోరాటానికి తెరదించాడు. దీంతో జింబాబ్వే 49.3 ఓవర్లలో 276 పరుగులకు కుప్పకూలింది. చివరి ఆరు వన్డేల్లో ఏకంగా మూడో శతకం బాదిన సికందర్‌ రజా.. జింబాబ్వేలో ఐదు శతకాలు సాధించిన ఘనత సాధించాడు. భారత బౌలర్లలో స్పిన్నర్లు అక్షర్‌ పటేల్‌ (2/30), కుల్దీప్‌ యాదవ్‌ (2/38) రాణించగా.. పేసర్లు ధారాళంగా పరుగులు ఇచ్చారు. అవేశ్‌ ఖాన్‌ (3/66) మూడు వికెట్ల ప్రదర్శనతో మెరువగా.. దీపక్‌ చాహర్‌, శార్దుల్‌ ఠాకూర్‌ పరుగుల పొదుపు పాటించలేదు.
శతకబాదిన గిల్‌ : టాస్‌ నెగ్గిన తొలుత బ్యాటింగ్‌ ఎంచుకున్న భారత్‌ ఆశించిన స్కోరు సాధించలేదు!. ఓపెనర్లు శిఖర్‌ ధావన్‌ (40, 68 బంతుల్లో 5 ఫోర్లు), కెఎల్‌ రాహుల్‌ (30, 46 బంతుల్లో 1 ఫోర్‌, 1 సిక్స్‌) తొలి వికెట్‌కు 63 పరుగులు జోడించారు. పవర్‌ప్లేలో ఓపెనర్లు ఇద్దరూ దూకుడుగా ఆడలేదు. పేసర్లకు అనుకూలించిన పిచ్‌పై నెమ్మదిగా పరుగుల వేట సాగించారు. కానీ ఇద్దరూ మంచి ఆరంభాలను సద్వినియోగం చేసుకోలేదు. నం.3 బ్యాటర్‌ శుభ్‌మన్‌ గిల్‌ (130) జోరు కొనసాగించాడు. ఆరు ఫోర్లతో 51 బంతుల్లో అర్థ సెంచరీ సాధించిన శుభ్‌మన్‌.. శతకం దిశగా వేగంగా దూసుకెళ్లాడు. మరో 31 బంతుల్లోనే సెంచరీ పూర్తి చేశాడు. ఇషాన్‌ కిషన్‌ 61 బంతుల్లో అర్థ సెంచరీతో ఆకట్టుకున్నాడు. దీపక్‌ హుడా (1), సంజు శాంసన్‌ (15), అక్షర్‌ పటేల్‌ (1) నిరాశపరచటంతో భారత్‌ 289 పరుగులతోనే సరిపెట్టుకుంది. జింబాబ్వే బౌలర్‌ బ్రాడ్‌ ఎవాన్స్‌ (5/54) ఐదు వికెట్ల ప్రదర్శనతో ఆకట్టుకున్నాడు.
స్కోరు వివరాలు :
భారత్‌ ఇన్నింగ్స్‌ : ధావన్‌ (సి) విలియమ్స్‌ (బి) ఎవాన్స్‌ 40, రాహుల్‌ (బి) ఎవాన్స్‌ 30, శుభ్‌మన్‌ గిల్‌ (సి) కియ (బి) ఎవాన్స్‌ 130, ఇషాన్‌ కిషన్‌ (రనౌట్‌) 50, దీపక్‌ హుడా (బి) ఎవాన్స్‌ 1, సంజు శాంసన్‌ (సి) కయటనో (బి) జాంగ్వే 15, అక్షర్‌ పటేల్‌ (సి) సికందర్‌ (బి) న్యుయచి 1, శార్దుల్‌ ఠాకూర్‌ (సి) న్యుయచి (బి) ఎవాన్స్‌ 9, దీపక్‌ చాహర్‌ నాటౌట్‌ 1, కుల్దీప్‌ యాదవ్‌ నాటౌట్‌ 2, ఎక్స్‌ట్రాలు : 10, మొత్తం : (50 ఓవర్లలో 8 వికెట్లకు) 289.
వికెట్ల పతనం : 1-63, 2-84, 3-224, 4-227, 5-256, 6-272, 7-282, 8-286.
బౌలింగ్‌ : రిచర్డ్‌ 9-0-58-0, విక్టర్‌ 10-1-48-1, బ్రాడ్‌ ఎవాన్స్‌ 10-0-54-5, సికందర్‌ 10-1-39-0, ల్యూక్‌ 5-0-49-1, విలియమ్స్‌ 5-0-30-0, టోనీ 1-0-10-0.
జింబాబ్వే ఇన్నింగ్స్‌ : కయటనో (స్టంప్డ్‌) కిషన్‌ (బి) కుల్దీప్‌ 13, ఇన్నోసెంట్‌ (ఎల్బీ) చాహర్‌ 6, విలియమ్స్‌ (ఎల్బీ) అక్షర్‌ 45, టోనీ (సి) రాహుల్‌ (బి) అవేశ్‌ 15, సికందర్‌ (సి) గిల్‌ (బి) శార్దుల్‌ 115, రేగిస్‌ (సి,బి) అక్షర్‌ 16, బర్ల్‌ (సి) ధావన్‌ (బి) చాహర్‌ 8, ల్యూక్‌ (సి) గిల్‌ (బి) కుల్దీప్‌ 14, ఎవాన్స్‌ (ఎల్బీ) అవేశ్‌ 28, రిచర్డ్‌ నాటౌట్‌ 2, విక్టర్‌ (బి) అవేశ్‌ 0, ఎక్స్‌ట్రాలు : 14, మొత్తం : (49.3 ఓవర్లలో ఆలౌట్‌) 276.
వికెట్ల పతనం : 1-7, 2-36, 3-84, 4-120, 5-122, 6-145, 7-169, 8-273, 9-275, 10-276.
బౌలింగ్‌ : చాహర్‌ 10-0-75-2, అవేశ్‌ 9.3-1-66-3, శార్దుల్‌ 9-0-55-1, కుల్దీప్‌ 10-0-38-2, దీపక్‌ 1-0-9-0, అక్షర్‌ 10-1-30-2.
            కామన్‌వెల్త్‌ క్రీడల్లో పతకం సాధించిన తెలంగాణ బాక్సర్‌ మహ్మద్‌ హుస్సాముద్దీన్‌ను భారత హ్యాండ్‌బాల్‌ సంఘం అధ్యక్షుడు అర్శనపల్లి జగన్‌మోహన్‌రావు సత్కరించారు. తెలంగాణ యువతకు స్ఫూర్తిగా నిలిచిన హుస్సాముద్దీన్‌.. భవిష్యత్‌లో మరిన్ని విజయాలు సాధించాలని జగన్‌మోహన్‌రావు ఆకాంక్షించారు.