పుణె : తెలుగు యోధాస్‌ అల్టిమేట్‌ ఖోఖో లీగ్‌ ప్లే ఆఫ్స్‌లోకి ప్రవేశించింది. సోమవారం జరిగిన మ్యాచ్‌లో గుజరాత్‌ జెయింట్స్‌ను 88-21తో రికార్డు 67 పాయింట్ల తేడాతో చిత్తు చేసిన తెలుగు యోధాస్‌ సీజన్లో ఐదో విజయం నమోదు చేసింది. యోధాస్‌ అవధూత్‌ పాటిల్‌ ఏకంగా 6 నిమిషాల 8 సెకండ్ల డిఫెన్స్‌తో సీజన్‌ రికార్డు నమోదు చేశాడు. ప్రథమార్థంలోనే 53-8తో తిరుగులేని ఆధిక్యంలో నిలిచిన తెలుగు యోధాస్‌.. ప్లే ఆఫ్స్‌ బెర్త్‌ ఖాయం కావటంతో మరింత రెచ్చిపోయింది. అటాకర్‌ ప్రజ్వల్‌ 15 పాయింట్లతో సత్తా చాటాడు. కెప్టెన్‌ ప్రతీక్‌ సైతం డిఫెన్స్‌లో ఆకట్టుకున్నాడు. బుధవారం జరిగే మరో మ్యాచ్‌లో ఒడిశా జగర్‌నాట్స్‌తో తెలుగు యోధాస్‌ తలపడనుంది.