- అల్టిమేట్‌ ఖోఖో లీగ్‌ ప్రకటన
పుణె : అల్టిమేట్‌ ఖోఖో లీగ్‌ (యుకెకె) తొలి సీజన్లోనే భారీ నగదు బహుమతి ప్రకటించింది. అల్టిమేట్‌ ఖోఖో లీగ్‌ ప్లే ఆఫ్స్‌ మ్యాచులు నేటి నుంచి ఆరంభం కానున్నాయి. ఈ నేపథ్యంలో లీగ్‌ నిర్వాహకులు గురువారం రూ. 2 కోట్ల భారీ ప్రైజ్‌మనీ ప్రకటించారు. యుకెకె విజేత రూ. 1 కోటి దక్కించుకోనుండగా.. రన్నరప్‌ రూ. 50 లక్షలు సొంతం చేసుకోనుంది. మూడో స్థానంలో నిలిచిన జట్టు రూ. 30 లక్షలు దక్కించుకోనుంది. మరో రూ.20 లక్షల విలువైన నగదు బహుమానాలు సైతం నిర్వాహకులు అందించనున్నారు. నేడు ప్లే ఆఫ్స్‌లో భాగంగా ఎలిమినేటర్‌లో తెలుగు యోధాస్‌, చెన్నై క్విక్‌ గన్స్‌ పోటీపడనున్నాయి. క్వాలిఫయర్‌1 మ్యాచ్‌లో గుజరాత్‌ జెయింట్స్‌, ఒడిశా జాగర్‌నాట్స్‌ తలపడనున్నాయి. క్వాలిఫయర్‌ 1 విజేత నేరుగా ఫైనల్స్‌కు చేరనుండగా.. ఎలిమినేటర్‌ విజేత, క్వాలిఫయర్‌ 1లో ఓడిన జట్టు క్వాలిఫయర్‌2లో తలపడతాయి. ఇందులో నెగ్గిన జట్టు టైటిల్‌ పోరుకు చేరనుంది.
ఇక, బుధవారం జరిగిన లీగ్‌ దశ చివరి మ్యాచ్‌లో ఒడిశాను తెలుగు యోధాస్‌ చిత్తు చేసింది. 65-36తో తెలుగు యోధాస్‌ 29 పాయింట్ల తేడాతో ఘన విజయం సాధించింది. ఆరు విజయాలతో పాయింట్ల పట్టికలో మూడో స్థానానికి పరిమితమైన తెలుగు యోధాస్‌.. పాయింట్ల వ్యత్యాసంలో 150 పాయింట్లతో ఎవరికీ అందనంత ఎత్తులో నిలిచింది.