- లెజెండ్స్‌ లీగ్‌ క్రికెట్‌ సీజన్‌ 2
న్యూఢిల్లీ : సెప్టెంబర్‌ 15న ఈడెన్‌ గార్డెన్స్‌లో జరుగనున్న బెనిఫిట్‌ మ్యాచ్‌కు జాన్‌ బుకానన్‌, లాల్‌చంద్‌ రాజ్‌పుత్‌లు కోచ్‌లుగా నియమితులయ్యారు. లెజెండ్స్‌ లీగ్‌ క్రికెట్‌లో భాగంగా ఇండియా మహారాజాస్‌, వరల్డ్‌ జెయింట్స్‌ బెనిఫిట్‌ మ్యాచ్‌ ఆడనున్నాయి. ఇండియా మహారాజాస్‌కు జాన్‌ బుకానన్‌, వరల్డ్‌ జెయింట్స్‌ జట్టుకు లాల్‌చంద్‌ రాజ్‌పుత్‌లు కోచ్‌లుగా వ్యవహరించనున్నారు. ఈ బెనిఫిట్‌ మ్యాచ్‌ ద్వారా ఆర్జించిన పూర్తి ఆదాయాన్ని దిగ్గజ క్రికెటర్‌ కపిల్‌దేవ్‌ నడుపుతున్న ఖుషీ ఫౌండేషన్‌కు ఇవ్వనున్నారు. బాలికల విద్య కోసం ఖుషీ ఫౌండేషన్‌ క్షేత్రస్థాయిలో కృషి చేస్తోంది. ఈ మేరకు లెజెండ్స్‌ లీగ్‌ క్రికెట్‌ సహా వ్యవస్థాపకులు, సీఈవో రామన్‌ రహేజా తెలిపారు. ఇక, లెజెండ్స్‌ లీగ్‌ క్రికెట్‌లో నాలుగు జట్లు పోటీపడుతున్నాయి. సెహ్వాగ్‌ సారథ్యంలోని గుజరాత్‌ జెయింట్స్‌, గౌతం గంభీర్‌ కెప్టెన్సీలోని ఇండియా క్యాపిటల్స్‌ జట్లు సెప్టెంబర్‌ 16న ఆరంభ మ్యాచ్‌లో తలపడనున్నాయి. మణిపాల్‌ టైగర్స్‌,బిల్వారా కింగ్స్‌ లీగ్‌లో ఆడనున్న మరో రెండు జట్లు. లెజెండ్స్‌ లీగ్‌ క్రికెట్‌ సీజన్‌ 2 స్టార్‌స్పోర్ట్స్‌ నెట్‌వర్క్‌లో ప్రసారం కానుంది.
