హైదరాబాద్: జాతీయ, అంతర్జాతీయ స్థాయి టోర్నీల్లో పతకాలతో దేశ ఖ్యాతిని ఇనుమడింపజేస్తున్న పారా అథ్లెట్లకు సముచిత గౌరవం దక్కింది. ప్రముఖ ఫ్లాట్‌ ప్రమోటర్‌ జీస్వ్కేర్‌ హౌజింగ్‌ సంస్థ సోమవారం పారా ఒలింపియన్లకు వింగ్స్‌ ఆఫ్‌ ఫైర్‌ అవార్డులు అందించింది. 2022 సంవత్సరానికి గాను మరియప్పన్‌ తంగవేలు(హైజంప్‌), మాన్సి జోషి(బ్యాడ్మింటన్‌) అవార్డులతో పాటు నగదు బహుమతి దక్కించుకున్నారు. ఈ సందర్భంగా జీస్వ్కేర్‌ హౌజింగ్‌ సీఈవో ఈశ్వర్‌ మాట్లాడుతూ 'దివ్యాంగులైనప్పటికీ వారు ఎంచుకున్న రంగాల్లో అద్భుత ప్రగతి సాధిస్తున్నారు. వీరు ఎంతో మందికి ఆదర్శం. పారా ప్లేయర్ల ప్రయత్నాలకు మద్దతుగా నిలువడంతో పాటు వీలైనంత ప్రోత్సహిస్తాం. రాబోయే రోజుల్లో 100మందికి పైగా పారా అథ్లెట్లకు స్పాన్సర్‌ చేయడానికి ప్రణాళిక చేశాం' అని అన్నారు. ఈ కార్యక్రమంలో స్టార్‌ షట్లర్‌ సాయిప్రణీత్‌, సీఆర్పీ ఎఫ్‌ డీఐజీ అనిల్‌మింజ్‌, ఈశ్వర్‌ తదితరులు పాల్గొన్నారు.
