- సిరీస్‌ విజయంపై ఇరు జట్ల గురి
- నేడు ఢిల్లీలో అమీతుమీకి సిద్ధం
- మధ్యాహ్నాం 1.30 నుంచి స్టార్‌స్పోర్ట్స్‌లో..
నవతెలంగాణ-న్యూఢిల్లీ :వన్డే సిరీస్‌ అంతిమ సమరానికి చేరుకుంది. భారత్‌లో అరుదైన వన్డే సిరీస్‌ విజయంపై సఫారీలు కన్నేయగా.. వరల్డ్‌కప్‌ ముంగిట సఫారీలకు సిరీస్‌ విజయంతో షాకిచ్చేందుకు యువ భారత్‌ ఎదురుచూస్తోంది. సఫారీలకు నేటి నిర్ణయాత్మక మ్యాచ్‌ సిరీస్‌తో పాటు సూపర్‌ లీగ్‌ పాయింట్ల కోసం కీలకం. 2023 వన్డే వరల్డ్‌కప్‌కు నేరుగా అర్హత సాధించేందుకు సూపర్‌ లీగ్‌ పాయింట్లు దక్షిణాఫ్రికా అత్యంత అవసరం. దీంతో నేడు ఢిల్లీలోనై ఎలాగైనా భారత్‌పై విజయం సాధించాలనే తపన సఫారీల్లో కనిపిస్తోంది. భారత్‌, దక్షిణాఫ్రికా నిర్ణయాత్మక వన్డే నేడు. కెప్టెన్‌ తెంబ బవుమా ఫామ్‌ దక్షిణాఫ్రికాకు ప్రధాన ఆందోళనగా మారింది. నేడు బవుమా ఆ సమస్యకు సమాధానం ఇస్తాడేమో చూడాలి.
ఆ ఇద్దరు మెరిసేనా? : కెప్టెన్‌ ధావన్‌, యువ బ్యాటర్‌ గిల్‌ రెండు మ్యాచుల్లోనూ నిరాశపరిచారు. చివరి మ్యాచ్‌లోనైనా ఈ ఇద్దరు టాప్‌ ఆర్డర్‌లో విలువైన ఇన్నింగ్స్‌లు ఆడాల్సిన అవసరం ఉంది. వన్డే శతకం కోసం సుమారు 30 ఇన్నింగ్స్‌లుగా ఎదురుచూస్తున్న శిఖర్‌ ధావన్‌.. ఆ ముచ్చట సొంతగడ్డపై తీర్చుకుంటాడేమో చూడాలి. సఫారీ పేసర్లను గిల్‌ ఎదుర్కొవటంపై నేడు ఫోకస్‌ ఎక్కువగా ఉండనుంది. ఇషాన్‌ కిషన్‌, శ్రేయస్‌ అయ్యర్‌, సంజు శాంసన్‌లు మెరుపు ఇన్నింగ్స్‌లతో వన్డే సిరీస్‌లో హైలైట్‌గా నిలిచారు. ఢిల్లీలోనూ ఈ త్రయం జోరు కొనసాగనుంది. రజత్‌ పటిదార్‌, రాహుల్‌ త్రిపాఠి అవకాశం కోసం ఎదురుచూస్తున్నారు. బౌలింగ్‌ విభాగంలో మహ్మద్‌ సిరాజ్‌ కీలకం కానున్నాడు. బుమ్రా స్థానంలో టీ20 ప్రపంచకప్‌కు వెళ్లాలనే ఆలోచనలో ఉన్న సిరాజ్‌.. రాంచీలో ఆ దిశగా సెలక్టర్లను మెప్పించాడు. నేడూ మెరిస్తే సిరాజ్‌ అవకాశాలు మరింత మెరుగవుతాయి.
పిచ్‌, వాతావరణం : ఇక్కడ కొన్ని రోజులుగా వర్షం కురుస్తుంది. మ్యాచ్‌ రోజు ఉదయం సైతం వర్షం సూచనలు ఉన్నాయి. వర్షంతో మ్యాచ్‌కు ఆటంకం ఏర్పడినా.. కుదించిన ఓవర్లతో నిర్ణయాత్మక మ్యాచ్‌ జరిగేందుకు అవకాశం మెండు. నిలకడగా వర్షంతో సహజంగానే పిచ్‌ పేసర్లకు అనుకూలించనుంది. 2019 తర్వాత ఇక్కడ వన్డే మ్యాచ్‌ జరుగలేదు. టాస్‌ నెగ్గిన జట్టు తొలుత బ్యాటింగ్‌ ఎంచుకునేందుకు మొగ్గుచూపవచ్చు.
తుది జట్లు (అంచనా) :
భారత్‌ : శిఖర్‌ ధావన్‌ (కెప్టెన్‌), శుభ్‌మన్‌ గిల్‌, ఇషాన్‌ కిషన్‌, శ్రేయస్‌ అయ్యర్‌, సంజు శాంసన్‌ (వికెట్‌ కీపర్‌), శార్దుల్‌ ఠాకూర్‌, వాషింగ్టన్‌ సుందర్‌, ముకేశ్‌ కుమార్‌, కుల్దీప్‌ యాదవ్‌, అవేశ్‌ ఖాన్‌, మహ్మద్‌ సిరాజ్‌.
దక్షిణాఫ్రికా : క్వింటన్‌ డికాక్‌ (వికెట్‌ కీపర్‌), రీజా హెండ్రిక్స్‌, తెంబ బవుమా, ఎడెన్‌ మార్కరం, హెన్రిచ్‌ క్లాసెన్‌, డెవిడ్‌ మిల్లర్‌, వేనీ పార్నెల్‌, కేశవ్‌ మహరాజ్‌, ఎన్రిచ్‌ నోకియా, లుంగి ఎంగిడి, కగిసో రబాడ.