- ఆంధ్ర రెండో మ్యాచ్‌ వర్షార్పణం
- సయ్యద్‌ ముస్తాక్‌ అలీ టి20
జైపూర్‌: సయ్యద్‌ ముస్తాక్‌ అలీ టి20 లీగ్‌లో భాగంగా ఆంధ్రప్రదేశ్‌ జట్టు ఆడాల్సిన రెండో మ్యాచ్‌ కూడా రద్దయ్యింది. జైపూర్‌ వేదికగా ఎలైట్‌ గ్రూప్‌-డిలో బుధవారం ఆంధ్రప్రదేశ్‌-హిమాచల్‌ ప్రదేశ్‌ జట్ల మధ్య జరగాల్సిన మ్యాచ్‌ వర్షంతో రద్దయ్యింది.కనీసం టాస్‌ వేసేందుకు కూడా అవకాశం దక్కలేదు. మంగళవారం సౌరాష్ట్రతో ఆంధ్రజట్టు తలపడాల్సి ఉన్నా.. ఆ మ్యాచ్‌ కూడా రద్దయిన విషయం తెలిసిందే. ఇక గ్రూప్‌-బిలో ఉన్న హైదరాబాద్‌ జట్టు 4పరుగుల తేడాతో పాండిచ్ఛేరిపై విజయం సాధించింది. తొలిగా బ్యాటింగ్‌కు దిగిన హైదరాబాద్‌ నిర్ణీత 20 ఓవర్లలో 7వికెట్ల నష్టానికి 147పరుగులు చేసింది. తిలక్‌ వర్మ(57), మిక్కీ జైస్వాల్‌(44) తన్మరు అగర్వాల్‌(33) బ్యాటింగ్‌లో రాణించారు. పాండిచ్ఛేరి బౌలర్లు భరత్‌ శర్మకు నాలుగు, కృష్ణ పాండే, సాగర్‌కు ఒక్కో వికెట్‌ దక్కాయి. ఛేదనలో పాండిచ్ఛేరి జట్టు నిర్ణీత ఓవర్లు పూర్తయ్యే సమయానికి 4వికెట్లు కోల్పోయి 143పరుగులే చేయగల్గింది. రామచంద్రన్‌(35), పరమేశ్వరన్‌(32), మోహిత్‌(28) బ్యాటింగ్‌లో రాణించగా.. భగత్‌ వర్మ, తిలక్‌ వర్మ, మిలంద్‌కు ఒక్కో వికెట్‌ దక్కాయి.